Hvat fært tú gerandisdagin at ganga við?
- Eg skifti mær mjødnina fyrr í ár, og havi tí gingið heima eitt skifti. Eg havi nú havt góða tíð at vitja fólk, grannar og familjuna. Beint áðrenn tú ringdi í áðni, var eg júst og vitjaði her í grannalagnum.
- So kann eg nevna, at dóttir okkara, Jóna Mikala sum býr í Danmark var og vitjaði heima í summar. Annars hava vit verið ein túr í Suðuroy í summar. Tað er tað longsta, vit hava verið í ár.
Tú sat á tingi fyri Sambandsflokkin frá 1990-94. Hvat heldur tú um føroyskan politikk í dag?
- Tað er ikki lætt at vera politikkari í dag, tí tað eru so strammar tíðir, har stórar sparingar mugu gerast á mongum økjum, t.d. á sjúkrahúsum og á røktarheimum. Ringu tíðirnar gera tað sera tungt at stýra landinum - eingin ivi um tað.
- Men tá ein hugsar um tað flokspolitiska arbeiðið, so hevði mær dámt munandi betur, um flokkarnir sjálvir vóru meiri samdir innanveggja - altso, at ein flokkur stendur saman sum EIN flokkur.
Tú gavst sum tannlækni á jólum í fjør. Men ert tú púrasta farin frá tannlæknastóli og bori?
- Nei. Eg havi onkutíð áður hugsað tankan um at sleppa at síggja eitt sindur meiri enn tað, sum er her í Føroyum. Eg havi nú kannað møguleikarnar at fara til Grønlands at arbeiða sum tannlækni eitt skifti. Og gongst sum ætlað, verður tað helst til tað í nærmastu framtíð.
snorri@sosialurin.fo
