Høgni Mohr
Ein av mongu stórslignu og forvitnisligu støðunum í Føroyum, ið mong ferðafólk hava vitjað á útferðum við Palla Lamhauge í Vestmanna, er latið aftur fyri vitjandi.
Undir fyrsta ferðafólkatúrinum undir Vestmannabjørgunum við bátinum, Silju, fyrramorgunin, varð staðfest, at ein stórur biti av Halgisbergi í Lítlabergsgjógv er rapaður í havið.
Lopið er okkurt um 150 metrar høgt og í meðal einar fimm favnar djúpt.
Ongin atgongd
Grótnøgdin í lopinum var so stór, at innsiglingin til holið í Lítlabergsdrangi, sum vanligt er at sigla ígjøgnum, varð byrgt av. Skiparin á Silju hendan morgunin, Jákup Andrias Lamhauge, noyddist tískil so nakkalangur at venda bátinum og stima út aftur sama veg, ið hann var komin. Umframt Sosialin, vóru eini tíggju útlendsk ferðafólk og borgarstjórin í Vestmanna, Gunn Joensen, við á ferðini.
Ramur brendaroykur
Tað er ikki heilt greitt, nær gjáarbergið er lopið. Men Palli Lamhauge er púra vísur í, at mánadagin 8. mai sigldi hann ígjøgnum holið, sum nú er sperrað av stóra lopinum.
Tá ið Sosialurin og manningin á Silju staðfestu lopið um ellivutíðina tórsmorgun, bendu runudálkaður sjógvur og ramur brendaroykur í gjónni á, at bergið júst var lopið; kanska sama morgun.
Ongar røkur burtur
Vestmannabjørgini eru mong. Tískil verður fuglalívið í bjørgunum lítið og einki ávirkað av lopinum. Fitt av lomviga eigur í Vestmannabjørgunum, ella eysturi undir Landi, tey kalla; men lomvigarnir halda til á smølum og spjøddum lomvigareygum. Einasta veruliga lomvigarók í Vestmannabjørgunum er sambært staðkendum monnum í Heygadrangi, sum stendur skamt norður úr Lítlabergsdrangi, ið nú so brádliga varð stongdur fyri almennari bátaferðslu.
