Í meiri enn eina øld hava onglendingar og onnur roynt at loysa gátuna um drápsmannin Jack the Ripper. Gitingarnar hava verið nógvar. Almenningurin hevur gitt, og fjølmiðlar og rithøvundar hava roynt at rannsaka seg fram til loysnina. Metropolitan Police í London hevur eisini havt síni boð, men enn tann dag í dag liggur málið har saman við hinum, sum ikki eru avgreidd.
Nógvir menn hava verið nevndir sum møguligir Jack the Ripper, og ein fyrrverandi sakførari vildi í sínari bók um gátuna vera við, at talan var ikki um ein drápsmann, men heldur eina drápskvinnu. Men heldur ikki tað bleiv tað seinasta boðið.
Nú eru tveir høvundar komnir við einum boði afturat upp á spurningin um, hvør drápsmaðurin frá Whitechapel veruliga var.
Tað var reiðmaðurin
Rithøvundarnir Christer Holmgren og Edward Stow vilja vera við, at tað var reiðmaðurin Charles Cross, sum var tann óhugnaligi drápsmaðurin. Hesin Charles Cross er umrøddur í øllum bókum um Jack the Ripper, tí tað var hann, sum í síni tíð segði seg hava funnið tað fyrsta offurið, Polly Nichols, tá hann var á veg til arbeiðis um morgunin tann 31. august í 1888.
Eitt vitni greiddi løgregluni frá, at tað hevði sæð Charles Cross standa bendan framyvir uppi yvir offurinum. Men Cross segði seg hava staðið á vegnum nakað burtur frá teirri deyðu kvinnuni.
Christer Holmgren og Edward Stow halda, at Charles Cross mundi hava myrt Polly Nichols, men at hann bleiv órógvaður av vitninum, júst sum hann var liðugur við gerning sín.
– Vit halda, at Charles Cross, maðurin, sum fann tað fyrsta líkið, er Jack the Ripper. Hann varð sæddur standa uppi yvir offurinum, men bleiv órógvaður, júst sum hann var í ferð við at fjala nøkur av sárunum, sigur Edward Stow við blaðið The Telegraph.
Brúkti falskt navn
Teir báðir rithøvundarnir vísa á, at tey fýra næstu drápini hjá Jack the Ripper hendu millum húsini hjá Charles Cross í Doveton Street og arbeiðspláss hansara í Broad Street, og at tey vóru ta tíðina á samdøgrinum, tá hann gekk til ella frá arbeiði.
– Hvørki løgreglan ella nakar annar legði seg eftir at kanna hansara gerandisdag ella onnur viðurskifti, og tað er heldur ikki lætt at halda skil á navni hansara í fólkateljingunum. Men vit eru komnir eftir, at hann brúkti eitt falskt navn, tá løgreglan tosaði við hann. Í veruleikanum æt hann ikki Charles Cross, men Charles Latchmere, sigur Edward Stow við The Telegraph. Cross ella Latchmere doyði í 1920.
Í Metropolitan Police vóru teir sannførdir um, at drápsmaðurin mátti vera ein serlingur av einum ella øðrum slagi, og tí leitaðu teir eisini eftir einum, sum ikki var sum hini. Men Edward Stow sigur, at í flestu drápsmálum vísir tað seg, at drápsmaðurin er sum fólk flest ella næstan.
– Hann gekk fram við hvørjum einasta drápsstaði á veg til arbeiðis. Hann er tann, sum samsvarar best við myndina av Jack the Ripper, leggur rithøvundurin afturat.
Nógvir møguleikar
Tað finnast óteljandi bøkur og blaðgreinar um tann gátufulla drápsmannin í London, og søgan hevur fleiri ferðir verið á leikpalli, og fleiri filmar eru eisini gjørdir um hana. Ja, hon hevur enntá lagt lunnar undir sangleikir. Men tað er ein sannroynd, at innihaldið í hesum nógvu útgávunum hevur ikki altíð verið serliga nær sannleikanum, og mangan er veruleikin snaraður hendanvegin og hinvegin.
Gitingarnar hava sum nevnt verið nógvar upp ígjøgnum árini, og tað er næstan einki mark fyri, hvønn fólk høvdu illgruna til ella hildu vera eitt boð. Onkur vildi vera við, at tað var sjálvur lívlæknin hjá Victoriu drotning. Onkur annar helt, at tað var ein kongaligur hertogi, sum hevði mist vit og skil. Ella var tað kanska tann loyniliga russiska løgreglan, sum gjørdi um seg í bretska høvuðsstaðnum? Ja, onkur vildi vera við, at tað var eingin annar enn tann dulfarfulli russiski munkurin Rasputin.
Ein søga var, at tað var ein yvirmaður í teirri kongaligu hirðini, sum var drápsmaðurin. Ein onnur peikaði á ein polskan skómakara, uppaftur ein onnur á ein jødiskan slaktara, og summar keldur søgdu tað vera skrivaran í Frelsunarherinum. Hugflognum bagdi í hvussu er einki.
