Súkkling
Eftir at hann longu á fyrstu veruligu etapuni vann sær ein fyrimun, helt íslendski Hafsteinn Ægir Geirsson fast um oddasessin, tá Statoil kring Føroyar varð súkklað frá miku- til sunnudagin.
Heldur ikki á einkultstartinum megnaðu hinir súkklararnir at gera nakað stórvegis við íslendeska favorittin, og tí var spenningurin mest sum burtur, áðrenn farið varð undir seinastu etapuna. Hendan endaði í Havnini, og tá komiðå var móti málinum, vóru fýra súkklarar mest sum púrasta javnir. Og her eydnaðist Gunnari Dahl-Olsen at spurta seg fyrst um strikuna, og tá talan samstundis var um einasta føryska etapusigurin í kappingini, mundi hetta kennast eyka væl hjá Gunnari.
Men í samlaðu støðuni var tað altso Hafsteinn, sum rann avstað við tí mesta.
Torkil gjørdi bart
Hjá unglingunum líktist Torkil Veyhe alla tíðina einum vinnara, og á seinasta strekkinum gjørdi hann veruliga bart. Munurin aftur til næsta súkklaran var ikki færri enn 10 minuttir, og tað setti eini tjúkka striku undir potentialið, sum býr í unga føroyska súkklaranum.
Hjá kvinnunum gjørdist skotska Jenny Wright greiður vinnari framman fyri tær báðar hetlendsku kvinnurnar, sum eisini vóru partur av kappingini.
