-Fundurin í London í gjár vísti, at hvørki føroyingar ella íslendingar eru sinnaðir at samráðast um at loysa makreltrætuna, og eg eri vónsvikin av, at londini ikki vísa veruligan vilja til samráðingar.
Tað sigur norski fiskimálaráðharrin, Lisbeth Berg-Hansen (myndin) við norska kringvarpið. Hon sigur, at Noreg og ES kunnu ikki góðtaka krøvini hjá føroyingum og íslendingum, tí tey eru alt ov stór og langt oman fyri tað, sum Noreg og ES halda tey bæði londini hava krav uppá.
Spurd, um talan verður um at seta nýggj tiltøk í verk ímóti føroyingum og íslendingum, svarar ráðharrin, at ES hevur arbeitt við krøvum leingi, og at Noreg fer at gera tað sama. Hon vil heldur ikki siga nakað um, hvørji tiltøk kunnu koma upp á tal.
