Tað er ivaleyst meira tað, at hýsuprísurin er frægur í løtuni enn, at toskaprísurin er vánaligur. Og tó. Toskur hevur verið dýrari fyrr í vár, enn hann er tað í løtuni - og hýsa hevur eisini fingið lægri prís, enn prísurin var á søluni í morgun.
Besti miðalprísur á toski í morgun var 17,86 krónur fyri tosk 1. Hinvegin var besti hýsuprísur - nevniliga fyri hýsu 3 - 19,92 krónur fyri kilo. Soleiðis fekk hýsa 3 á søluni í morgun heilar tvær krónur meira í miðal, enn størsti toskurin fekk.
Leggjast kann aftrat, at samlaðu nøgdirnar av toski vóru sløk 28 tons, og samlaðu nøgdirnar av hýsu vóru sjey tons. Samanbera vit miðalprísirnar á toski 2 og hýsu 2, fór toskurin fyri 17,61 og hýsan fyri 17,52.
Soleiðis er eingin prísmunur á toski og hýsu í løtuni.
Miðalprísurin fyri øll fiskasløgini samanlagt á marknaðinum í morgun var 23,48, og tað er langt ímillum, at ein so frægur miðalprísur vísir seg - og heilt sjáldan, tá talan er um størri nøgdir av fiski.
Uppí hesa søgu hoyrir, at aftrat toski og hýsu, vóru eisini stívliga 40 tons av svartkalva á marknaðinum, og her lá miðalprísurin oman fyri 31 krónur fyri kilo.
Tey tilsamans 82,2 tonsini á søluni í morgun vórðu seld fyri stívliga 1,9 miljónir krónur.
