Húsini niðanfyri Á handlin við Landavegin vórðu í gjárkvøldið flutt av stykkinum. Ein stálramma varð løgd undir húsini, sum síðani vórðu flutt í einum. Húsini standa nú á Argjahamri.
Húsini vórðu seld við tí treyt, at tey skuldu flytast av stykkinum, tí Á handilin við Landavegin skal útbyggjast og nútímansgerast.
Stjórin í P/F Poul Hansen, Høgni Hansen, sigur, at tey fingu nógvar fyrispurningar, tá húsini vórðu sett til sølu, hóast treytin var, at tey skuldu flytast av stykkinum. Húsini vórðu kortini ikki seld beinanvegin, tí áhugaðir keyparar máttu gera ymiskar kanningar fyrst.
Nú húsini eru flutt av stykkinum, verður farið undir at útbyggja Á handilin við Landavegin. Høgni Hansen sigur, at farið verður undir útbyggingina beinanvegin, og ætlanin er, at nýggi handilin verður liðugur í vár.
