Petur Sørensen kennir seg órættvíst viðfarnan av fyrrverandi arbeiðsgevara sínum, Auto. Tí fer hann at krevja endurgjald fyri mista inntøku, og hann fer harumframt at krevja skammbót (tort og sviði).
Orsøkin til at Petur Sørensen stevnir Auto fyri rættin er hon, at hann heldur seg vera uppsagdan uttan haldgóða grundgeving.
Tað var fríggjakvøldið tann 24. november, at Petur Sørensen koyrdi ein mann heim við hýruvogni sínum. Maðurin hevði ongan vekslipening og fór tí inn eftir peningi. Hann dettur fleiri ferðir á veg inn og útaftur. Tá hann kemur til bilin, vil hann hava vekslipeningin fyrst, áðrenn hann letur føraranum sín pening. Hetta gongur førarin tó ikki við til, og tað endar við, at hann ongan pening fær.
Tá Petur Sørensen einaferð skal hjálpa manninum upp, eftir at hann er dottin fleiri ferðir, vil maðurin vera við, at førarin hevur framt harðskap móti sær. Hetta vísti rætturin tó frá sær.
Misti loyvið
Tá Petur Sørensen sendir sonin, sum er avloysari, til arbeiðis leygarkvøldið eftir, fær hann at vita, at bilurin hevur mist loyvið, og seinni fær hann at vita, at Petur sleppur ikki at koyra fyri Auto framyvir.
? Hetta kom ógvuliga dátt við. Eg havi verið knýttur at Auto í samfull 24 ár, og eg hevði júst keypt mær ein nýggjan bil, sum kostaði mær fleiri hundrað túsund krónur, sigur Petur.
Petur hevur roynt at sloppið av við bilin síðani, men tað er ikki eydnast honum enn. So tað hevur verið ein dyggur fíggjarligur smeitur fyri Petur. Hann greiðir eisini frá, at børnini og familjan hava liðið undir hesum skuldsetingum, sum hava hingið omanyvir Peturi tað farna hálva árið.
Reinsaður
Men nú er Petur reinsaður fyri hesar skuldsetingar. Rætturin metti ikki, at hald var í ákærunum móti honum.
Danin, sum meldaði tilburðin til løgregluna, var eftir øllum at døma so dýrandi fullur, at hann er dottin fleiri ferðir og hevur soleiðis fingið onkrar smávegis snuddir. Danin greiddi hinvegin frá í rættinum, at hýruvognsførarin hevði sligið og sparkað hann fleiri ferðir.
Petur hevur ongar ætlanir um at fara aftur í arbeiði hjá Auto, men hann ivast ikki í at krevja endurgjald. Hann vil tó ikki nevna nakað krónutal enn. Tað kemur á borðið seinni.
Petur arbeiðir nú í fiskivinnuni á landi, har hann forvinnur til lívsins uppihald.
Í Auto eru tey hesuferð heldur fáorðað um hetta málið. Tey vistu heldur ikki av, at eitt endurgjaldskrav var á veg. Atli Simonsen er formaður í nevndini í Auto, og hann vil ikki gera nakrar viðmerkingar til málið beint nú.
