Høgni Madsen hevur havt eitt gott ár í Fuglafirði, har hann hevur verið ein týðandi partur av liðnum, sum í ár vann silvur heiðursmerki. Tað er besta úrslitið síðani 1979, tá ÍF vann landskappingina.
Tað er ikki óvanligt, at leikarar fara ein túr suðureftir, tá kappingin er komin at enda fyri at koma fyri seg aftur. Men ørindini hjá Høgna í Malta eru ikki bara hugni og vitja vinfólk.
– Eg fór til Malta at vitja ein góðan vinmann, ið hevur damu og barn her. So helt eg, at tað ljóðaði spennandi at finna útav hvussu fótbóltsmentanin er her, sigur Høgni Madsen úr Malta.
Høgni Madsen hevur verið í samband við fleiri feløg í Malta og royndarvenur við onkrum av teimum.
– Eg royni bara at venja við ymiskum feløgum her. Eg havi millum annað havt ein fund við eitt felag, ið spælir í bestu deildini, sigur miðvallarin.
Talan er um Hibernians FC, sum í løtuni liggur á triðja plássi í maltesisku Premier League.
– Har fari eg møguliga venja seinni i vikuni, greiður Høgni Madsen frá.
Sami kontaktpersónurin hevur eisini tryggjað føroyinginum møguleikan at venja við oddaliðnum í næstbestu deildini, Pieta Hotspurs FC.
– Ein umráðandi leikari hjá teimum bleiv skaddur í síðstu viku, og teir vilja hava meg at koma og vísa meg fram, greiður Høgni Madsen frá.
Hóast tað er ógreitt hvørjum stigi fótbólturin í næstbestu deildini er, so er hugurin hjá Høgna Madsen góður til at royna okkurt nýtt.
– Eg eri opin fyri øllum beint nú, og fari so at royna meg. Eisini fyri at kanna nærri hvørjum stigi næstbesta deildin í Malta er á, sigur miðvallarin.
Klárur fyri ÍF í 2013
– Hetta er fyrst og fremst eitt upplivilsi, sigur Høgni Madsen og vissar allar ÍF fjepparar um, at ætlanin er at koma aftur til ÍF áðrenn kappingarbyrjarn næstan ár.
Høgni verður fyribils burturstaddur í tvær vikur og kannar so teir møguleikar, sum eru. Skal miðvallarin spæla í maltesisku Premier League, so verður tað sum amatørur, tí hann framvegis hevur sáttmála við ÍF. Tað krevur eisini, at eitt møguligt felag í Malta kemur ásamt við ÍF um eina avtalu um flyting av spæliloyvi, sum liggur í ÍF.
– Eg venji við onkrum feløgum her næstu tvær vikurnar og taki so eina avgerð tá,. Eg havi eitt gott samstarv við ÍF, so har er alt í ordan við tí, sigur Høgni Madsen úr Malta.
Heitt á Malta
Tað er heitt á Malta og tað er ikki bara í veðrinum. Eisini áskoðararnir gera nógv burtur úr, tá grannauppgerðir eru á skránni. Tað hevur Høgni Madsen sjálvur roynt at verið vitni til, tá hann fór dystin millum Valletta FC og Floriana.
– Eg havi longu hugt eftir tí størstu grannauppgerðini og stemningurin var øgiligur. Tað vóru um 4.000 fólk, og tað var áhugavert at síggja hvussu tey sungu og dansaðu meðan dysturin var ígongd, sigur Høgni Madsen.
Føroyska landsliðið spældi í 1997 tvær ferðir móti Malta í HM 1998 undankappingini. Føroyar vann báðar dystirnar 2-1.
