? Um prinsippið verður tað, at vit kunnu yvirtaka stór málsøki uttan at binda okkum føst í danska ríkið, so kann tann nýggja avtalan við dansir gerast ótrúliga áhugaverd fyri føroyingar.
Tað sigur formaðurin í Tjóðveldisflokkinum, Høgni Hoydal, eftir at tað kom fram, at løgmaður og danski forsætisráðharrin mánadagin skrivaðu undir eina yvirlýsing um at leggja ein yvirtøkulóg fyri fólkatingið og løgtingið.
? Fyri okkum er tað avgerandi, um hendan lógin peikar frameftir og gevur føroyingum rættin til sjálvir at taka frælsi í hesum landinum, sigur Høgni Hoydal.
Tað vóru forðingar
Tann nýggja yvirtøkulógin skal víðka munandi um heimildirnar at yvirtaka málsøki, samstundis við at tilgongdin verður munandi lættari. Við yvirtøkulógini kunnu føroyingar taka yvir mál og málsøki, tá ið - og um - føroyingar ynskja tað.
? Vit settu gongd í hetta arbeiðið, tá ið vit sótu í landsstýrinum, men tá vóru forðingar fyri, at ein yvirtøkulóg kundi gerast. Um hesar forðingar eru ruddaðar á vegnum, so er hetta ein góð avtala, heldur Høgni Hoydal.
Hann vísir eisini á, at um danir við avtaluni góðkenna føroyingar sum eitt fólk við sjálvsavgerðarrætti, so er tað eisini ein stórur sigur fyri føroyingar.
? Hetta er nakað, sum vit hava stríðst fyri í langa tíð, og eg havi eisini júst sett ein fyrispurning á fólkatingi um hetta. Um so er, at nýggja avtalan góðkennir føroyingar sum eitt fólk við sjálvsavgerðarrætti, so er tað gleðiligt, sigur Høgni Hoydal.
