Fríggjadagin letur nýggj listaframsýning upp í Leikalund. Talan er um framsýning við málningum av Høgna Thomsen Høgni er føddur og uppvaksin í Klaksvík. Áhugin fyri at mála stavar heilt frá barnaárunum, men rættulig gongd kom ikki í fyrr enn um 18 ára aldur. Høgni hevur skeið innan málningalistina, eitt nú hjá Alex Krylow og frá Famous Artist School.
Tey myndaevni, ið hann hevur arbeitt við eru fyri tað mesta sprottin úr føroysku náttúruni. Eitt nú hava fjøll, sjógvur og tám spælt ein týðningarmiklan leiklut. Best hevur honum dámt at arbeitt við olju og vatnlitum, men eisini hevur hann roynt seg við akrylmálningum. Høgni hevur áður havt framsýningar bæði sjálvur og saman við øðrum listarfólki.
Til hesa framsýningina eru myndaevnini fossar og áir, sum eru málaðir í heystlitum. Høgni hevur arbeitt við tilfarinum til framsýningina í eina tíð og hevur allatíðina miðvíst stíla fram ímóti, at fáa myndirnar at standa saman sum eina eind
Í sambandi við at framsýningin letur upp verður móttøka. Har verður høvi at hitta listamannin, og øll eru hjartaliga vælkomin. Leikalund bjóðar í hesum sambandi ein kaffimunn. Framsýningin verður annars hangandi til seinast í november mánaða, og er at síggja í vanligari upplatingartíð hjá Leikalund - mánadag til fríggjadag frá 10 til 17.30 og leygardag frá 10-13.
