Bólkur-A:
Heiðrikur T. Jacobsen og Rúni Vørmadal vóru seedaðir aftastir í altíð sterka A-bólkinum, men serliga Heiðrikur hevði eina frálíka kapping við
fleiri óvæntaðum úrslitum.
Heiðrikur hevði heilt til síðsta umfar møguleika fyri medalju, men gjørdist hann akkurát ov stuttur. Tá samanumkom fekk Rúni ½ stig og Heiðrikur 3 stig.
Bólkur-B:
Høgni Egilstoft Nielsen og Rúni T. Jacobsen vóru styrkismettir ávíkavist nr. 3 og aftast. Báðir hava verið við fyrr, men serliga Høgna vóru høgar vónir um gott úrslit.
Samanumtikið skuffaðu teir heldur ikki. Rúni fekk ½ stig og endaði aftast, meðan Høgni fekk 4 stig og tryggjaði sær bronsu. Eitt sera flott úrslit hjá Høgna, sum reisti seg mannliga eftir tapið í 1. umfari og
tapti ikki aftur.
Bólkur-C:
Silas Eyðsteinsson og Eli W. Finnson eru "gamlir" kenningar í NM-høpi, men í ár vóru teir styrkismettir 3 lægst og aftast. Tí skuldi kanska ikki væntast alt ov nógv av teimum báðum, har rating-munurin millum t.d. Eli og nr. 1 var heili 800 ratingstig.
Silas og Eli fingu tó skavað saman 1 stig í part og tað er á góðari leið.
Bólkur-D:
Janus Skaale og Ragnar Weihe hava verið við fyrr, men hettar er fyrstu ferð í bólki D. Teir vóru lægst rataðir í einum sera sterkum bólki, men hóast hettar,
megnaði Janus at fáa 1 stig og Ragnar ½.
Hesir unglingarnir vera heilt víst at síggja í fleiri sterkum kappingum, halda teir áfram at telva og venja.
Bólkur-E:
Leif R. Fjallheim og Jón í Horni Nielsen vóru frammanundan lægst rataðir í bólkinum, men fingu ½ stig í part.
Á so ungum aldri og við lítlum ella ongum royndum, er avrikið hjá teimum fínasta slag - eisini hava teir fingið roynt seg altjóða.
Sum heild er at fegnast um, at allir telvararnir komu upp á stigatalvuna, og fingu nomið sær fleiri altjóða royndir.
Serliga Høgni hevði enn eina ferð eitt frálíkt úrslit, meðan Heiðrikur telvaði sum ein brandur millum komandi norðurlendsku stjørnurnar.
Miðvísur stuðul + venjing geva úrslit, og úrslitið vísir at nógv gott er í væntu.
Flott kempað allir samlir og hjartaliga til lukku Høgni Egilstoft Nielsen, skrivar Talvsambandið í kvøld.!
Á www.faroechess.com er leinkjur til Youtube klipp vm.
?
?
?
?
