Tað var oman fyri Skretting, at bilurin sum kom koyrandi norð eftir yvirhálaði ein annan. Vátaslettingur var, krapi var lægstur á vegin og førarin misti tamarhaldið á bilinum og fór sendandi niðan av vegnum. Bilurin fór út av við gronini fyrst. Men í sjálvari grøvini slongdist hann einaferð runt, rendi reyvina inn í eina hellu og slongdist upp á aftur vegin, har hann steðgaði við gronini frameftir.
Sum tað sæst á myndini, so er lítið gott eftir av bilinum. Reyvin fór í knús øll sum hon var orsaka av stoytinum inn í helluna, og gronin fór somuleiðis sera illa.
Sjálvt førarasetri brotnaði eisini undir óhappinum, men lukkutíð slapp førarin uttan sjónlig mein. Hann gekk sjálvur út í sjúkrabilin, sum flutti hann til Havnar til nærri kanningar.
