Gunnar á meistarakós - Sonni Ragnar á niðurflytingarkós

Lagnurnar eru ymiskar hjá føroyingafeløgunum í pepsideildini í Íslandi. FH stevnir ímóti meistaraheitinum, og Fylkir er framvegis á niðurflytingarkós

FH spældi oddadyst ímóti Stjarnuni á Kaplakrika leikvøllinum á Hafnarfjørðinum í kvøld. Gunnar Nielsen vardi málið hjá FH allan dystin, men tíverri bleiv eingin spælitíð til Kaj Leo í Bartalsstovu, sum sat á beinkinum hjá FH allan dystin. 

Atli Viðar Bjørnsson legði FH á odda tá 25 minuttir vóru farnir. Hólmbert Aron Friðjónsson javnaði níggju minuttir seinni, og var støðan 1-1 tá liðini fóru til hálvleik. Kassim Doumbia legði á odda 2-1 tá 54 minuttir vóru farnir, men longu tríggjar minuttir seinni javnaði Hólmbert Aron Friðjónsson til 2-2. Kassim Doumbia gjørdist stóra hetjan hjá FH, tá hann í 79. minutti skeyt sigursmálið til 3-2 til FH.

Boð vóru eftir Gunnari Nielsen, sum hevði nakrar bjargingar í dystinum. Málini hjá Hólmbert Aron Friðjónsson hjá Stjarnuni kundi Gunnar ikki gera tað stóra við. 

FH er nú greitt oddalið við 34 stigum. Hafnfirðingar eru sjey stig frammanfyri Fjølnir, Stjarnuna og Breiðablik, sum øll hava 27 stig. Seks umfør eru eftir at spæla í pepsideildini.

Sonni Ragnar Nattestad og liðfelagarnir í Fylkir eru framvegis á niðurflytingarkós. Í kvøld tapti Fylkir á heimavølli 0-3 ímóti Akranesi. Longu tá 27 minuttir vóru farnir var Akranes á odda 2-0. Tá 77 minuttir vóru farnir av dystinum fekk Sonni Ragnar Nattestad tað gula kortið fyri at fella ein mótstøðumann.  Í 17. minutti hevði Sonni Ragnar eina góða roynd á málið hjá Akranesi, men royndin bleiv bjargað á málstrikuni. 

Sunnudagin spælir Fylkir á útivølli ímóti Fjølnir. FH vitjar Vìking Ólafsvík, sum liggur fjórðaftast við 19 stigum.

Støðan í pepsideildini :