Bæði føroyingaliðini vóru í leiki í bestu íslendsku fótbóltsdeildini í dag.
Jóan Símun Edmundsson fekk seinasta hálva tíman á vøllinum, tá hann og liðfelagarnir í KA á heimavølli taptu 0-1 fyri Breiðablik á Greifavøllinum.
Breiðablik skoraði sigursmálið longu í trettanda minuttinum. Sambært Morgunblaðnum hevði Jóan Símun ein góðan málmøguleika, men hann sendi bóltin uppum málið.
KA er aftast í deildini við fýra stigum fyri seks dystir.
KA-Breiðablik 0-1 (0-1)
0-1 Aron Bjarnason ('13)
Gunnar Vatnhamar spældi allan dystin, tá hann og liðfelagarnir í Víkingi Reykjavík á heimavølli vunnu 3-1 á FH. Sambært íslendskum miðlum vóru verjumistøku, og harímillum eitt sjálvmál atvoldin til 3-1 sigurin hjá Víkingi.
Víkingur, Vestri og Breiðablik hava 13 stig í oddinum. Víkingur hevur besta málmunin, og tí eru Gunnar og liðfelagarnir oddalið.
Víkingur Reykjavík-FH 3-1
1-0 Sveinn Gísli Þorkelsson ('20)
1-1 Böðvar Böðvarsson ('32)
2-1 sjálvmál ('36)
3-1 Daníel Hafsteinsson ('67)
Komandi sunnudag klokkan 15 spælir KA dyst á útivølli móti ÍBV. Sama kvøld klokkan 20.15 tekur Stjarnan móti Víkingi Reykjavík.
