2. deild
Tey hava ligið lið um lið at kalla alt kappingarárið. B71 og B68 hava fram um øll hini verið liðini, sum kappingin í aðru deild hevur snarað um, og leygardagin hittast tey so fyri seinnu ferð í ár.
Fyrru uppgerðina millum liðini vunnu sandoyingarnir, og bara tað í sjálvum sær var kanska heldur óvæntað. Ikki tí eingin roknaði við B71, men meira tí øll longu undan kappingarárinum høvdu B68 sum risa-favorittar til beinleiðis uppflytingina.
Teir eru kanska eisini framvegis favorittar, men í øllum førum ikki eins stórir, sum teir vóru tað í vár. Og veruleikin er eisini, at B68 er nakað skert, nú teir skulu standa sveinaroyndina at kalla.
Fyrst og fremst, so hevur tað skert liðið munandi, at Julian Johnsson longu í vár varð somikið álvarsliga skaddur, at hann bara hevur havt leiklutin sum venjari - og ikki ein spælandi av slagnum - størsta partin av kappingarárinum.
Hartil hevur Jann Ingi Petersen fingið sær ov nógv gul kort á kontina. Tað seinasta av hesum kom rættiliga óneyðug, tá B68 annars var trygt á odda móti AB. Og tí er heldur ikki hann tøkur til uppgávuna leygardagin.
Hjá B71 tykist vera víst, at hvørki Símin Hansen ella Rene Clementsen vera tøkir til dystin. Hartil hevur verið ivasamt, hvørt málverjin, Símin Rógvi Hansen, fór at verða tøkur til dystin, eftir at hann fór út við skaða týskvøldið, tá B71 spældi móti HB. Hóskvøldið visti heimasíðan hjá B71 at siga, at tað verður hann ikki, og tí verður tað helst Waldemar Nowicki, sum skal standa millum stólparnar. Men hann man sum so ikki vera tann ringasti eykamaðurin hjá einum venjara at hava. Hartil verður Sverrir Kjærbo helst eisini við í hópinum hesaferð.
Og so kunnu vit hóskandi leggja afturat, at hóast dysturin hesaferð er rættiliga avgerandi, so er hann ikki altavgerandi. Áðrenn endaligi vinnarin av deildini kann kjósast, verður helst neyðugt við í minsta lagi 17 dystum. Og fyri bæði B71 og B68 er galdandi, at tey eiga eina vitjan á í Sandavági hjá FS Vágum 2004, og tað er í øllum førum ein uppgáva, sum er alt annað enn løtt.
