Hetta gjørdist eitt gott føroyingakvøld í næstbestu norsku fótbóltsdeildini.
Liðið hjá Mikkjali Thomassen, Jóannesi Bjartalíð og Brandi H. Olsen, Fredrikstad vann 2-1 á Kongsvinger í oddadystinum í Kongsvinger.
HER ber til at lesa um tann dystin.
Tað bleiv eisini til ein sigur til hini bæði føroyingaliðini, ið vóru í leiki í kvøld.
Gullbrandur í Horni Øregaard og liðfelagarnir í Sandnes ULF vunnu í kvøld triðja dystin á rað.
Sandnes vann 1-0 á Kristiansund á útivølli. Sigursmálið skoraði Horenus Tadesse seks minuttir undan steðginum. Gullbrandur spældi allan dystin.
Sandnes er nummar níggju í deildini við 26 stigum.
Noah Mneney slapp á vøllin seinastu 19 minuttirnar, tá hann og liðfelagarnir í Bryne vunnu 3-1 á Moss á heimavølli.
Andreas Dybevik legði Bryne á odda við einum brotssparki tá ein tími var leiktur av dystinum. 10 minuttir seinni økti Duarte Moreira til 2-0. Moss fekk spenning í uppgerðina tá 88 minuttir vóru leiktir av dystinum, men langt inni í tíðini dómarin hevði lagt aftrat gjørdist Duarte Moreira stóra hetjan hjá Bryne tá hann skoraði til 3-1.
Bryne er nummar 12 í deildini við 25 stigum.
Komandi sunnudag tekur Sandnes móti Mjøndalen. Sama dag spælir Bryne á útivølli móti Jerv.
