Fyrsti dagurin á oyggjaleikunum 2013 á Bermuda gjørdist føroyingum góður.
Fyrr í dag vunnu skjúttarnir gull, og harumframt fingu vit silvur í triatlon og í súkkling á landavegi, og eisini fingu Føroyar bronsu í kvinnufimleiki.
Nú er so tað gleðiliga hent, at føroyingar hava fingið eitt gullmerki afturat. Tað kom í liðkappingini í fimleiki hjá monnum, sum vunnu á Isle of Man.
Føroyska liðið fekk 76,050 stig og tað er 1,050 stig meira enn kappingarneytarnir av Man.
Sum støðan er nú, hava Føroyar fingið fimm heiðursmerkir, og í skrivandi løtu eru Føroyar nummar tvey á listanum yvir vunnin heiðursmerkir.
Myndatekstur: Føroyar hava vunnið gull í mansfimleiki fyri lið. Føroyar vunnu frammanfyri Isle of Man
Mynd: Fimleikasambandið
