Longu 7. mai ber aftur til at hoyra og uppliva vælumtóktu holukonsertirnar, har ein ferðast við norðlýsinum, meðan tónleikarar skipa fyri tónleiki í onkrari holu. Eisini er skráin fyri Summartónar 2002 løgd.
SUMMARTÓNAR 2002
Fyri 10 árum síðani, í juni 1992, var fyrsta Summartónastevnan hildin. Hugskotið áttu tey klassisku tónaskøldini innan Felagið Føroysk Tónaskøld, og Summartónar hevur síðani tá verið týdningarmiklasti
føroyski pallurin hjá tónaskøldunum. Á hvørjum ári verða verk skrivað til stevnuna.
Í 2002 eru hesu tónaskøldini umboðað:
Tróndur Bogason (f. 1976)
Atli K. Petersen(f. 1963)
Sunleif Rasmussen (f. 1961)
Edvard Nyholm Debess (f. 1960)
Bjarni Restorff (f. 1955)
Pauli í Sandagerði (f. 1955)
Kári Bæk (f. 1950)
Kristian Blak (f. 1947)
Til samans eiga teir 10 frumframførslur á stevnuni, og harafturat nakað tað sama av nýggjum verkum, sum hava verið framførd fyrst uttanlanda, men sum nú verða at hoyra fyri fyrstu ferð á føroyskum
palli. Summartónar er altjóða festival, og hevur sum so eisini heimspremieru av útlendskum tónaverkum: 3 íslendsk, 2 úr USA og 3 donsk verk framførast fyri fyrstu ferð alment í juni í Føroyum.
Tónleikarnar framføra bæði heilt nýggjan tónleik og klassisk verk úr renissansuni til 20. øld. Prentaða skráin verður at fáa frá mai mánaði.
Luttakandi bólkarnar eru:
Les Percussions Claviers de Lyon (Frakland)
DuoDenum (Danmark)
Tórshavnar Kamarkór (Føroyar)
Albin Brass (Bretland, Føroyar, Argentina, Svøríki)
Vefsn Ensemblet (Noregi)
Aldubáran (Føroyar)
Mad Cow Sings (Danmark)
Atli Ellendersen & Sune Vejlby Brogård (Føroyar / Brasilia, Danmark)
Hlómeyki (Ísland)
Mpiri (Føroyar / Danmark)
Harafturat spæla tónleikarar úr Estlandi, Føroyum, Argentina, Eysturríki, Svøríki og Danmark í Klæmintsgjógv í samband við Concerto Grotto.
Í bygd og bý
Konsertirnar í 2002 eru flestar um 17-24 juni. Harafturat eru konsertirnar "Sunnudagar við Gjógv" 30. juni og 14. juli. Eisini eru einstøk tiltøk í juli.
Støðini har Summartónar hava konsertir í ár eru:
Í Havn:
Meiaríið, Listaskálin, Norðurlandahúsið, Útvarpshøllin, Havnar Kirkja,
Uttanfyri Havnina eru støðini:
Vágur, Sandur, Hestur, Klæmintsgjógv, Kirkjubø, Fuglafjørður, Gøta, Gjógv, Klaksvík og Mykines - tilsamans 28 konsertir.
Harafturat koma Concerto Grotto konsertarnir, sum eisini eru fyriskipaðir av Summartónum. Tær byrja longu 7. mei og eru 21 í tali, og fara væntandi at føra útvið 1000 áhoyrarar inn í "aðra verð" undir Hestbjørgunum og undir Nólsoy.
