Seinastu vikuna í apríl gjørdi Magnus Heinason kanningar av æti á landgrunninum.
Hetta er kanning, sum verður gjørd á hvørjum ári hesa ársins tíð, nú ætið eigur at nørast, og fiskalarvur taka sína fyrstu føði.
- Kanningin vísti, at gróðurin er seinur í ár, og at enn er lítið av føði til fiskalarvur.
Tað sigur Havstovan í dag.
Lagt verður aftrat, at fiskalarvur frá í vár eru smáar hesa ársins tíð, og tí klára tær einans at taka smáa føði.
- Ætið frá í fjør er ov stórt, men egg og ungar undan ætinum frá í fjør eru góðir gloypibitar ta fyrstu tíðina. So skjótt, sum várgróðurin kemur í sjógvin og djóraætið fær føði, byrjar tað at gýta.
Kanningin hjá Magnusi Heinason vísti, at enn er gróðurin á landgrunninum ikki komin.
- Meginparturin av djóraætinum er stórt reyðæti frá í fjør. Enn er tí lítið av smáari føði til fiskalarvur. Bæði gróðurin og gýtingin hjá djóraæti økjast tó spakuliga.
Havstovan fylgir støðugt við gróðrinum, og á yngultúrinum í juni fæst meira at vita um, hvussu várið hevur hilnast.
