Grindin í Norðragøtu hevur lagt beinini. Tá alt kom til alt, vísti tað seg, at talan var um væl færri hval, enn mann helt.
- Hetta er eingin stór grind. Tað mugu hægst vera einir 20 hval, sigur Zakaris Jacobsen, grindaformaður.
Drápið gekk skjótt og væl, og har eru nógv fólk í Norðragøtu í dag. Um 20 bátar hava verið við í rakstrinum.
- Drápið gekk øgiliga væl, og tað gekk skjótt fyri seg, sigur Zakaris Jacobsen.
Grindin varð funnin út fyri Hagaleiti við brennistøðina í Leirvík fyrrapartin. Hon gekk skjótt suðureftir, og avgerð varð tikin um at reka hana til Gøtu. Av tí at tað var so ókyrt í Syðrugøtu, varð grindin heldur hildin til í Norðragøtu.
