Jan Müller
Aberdeen
Hvør er so orsøkin til, at bretar enn ikki hava kunngjørt sína útbjóðing kundi verið spurt. Svarið er einfalt: umhvørvisfelagsskapurin Greenpeace liggur í buktini. Talan er um at nøkta ávís umhvørviskrøv í eini EU-lóg, sum bretska stjórnin hevur góðkent. Greenpeace er farin til rættarmyndugleikarnar við málinum og tann 11, oktober skal ein dómari gera av, antin ein frágreiðing frá Greenpeace ella ein frá bretsku olju- og ídnaðarmyndugleikunum skal verða tikin til eftirtektar.
Verður tann frá Greenpeace góðkend, so er sannlíkt, at málið verður roynt í rættinum. Tað kann so taka drúgva tíð og tað fer so aftur at seinka eina komandi útbjóðing.
DTI hevur ongar viðmerkingar til hetta málið, men Sosialurin veit at siga frá, at málið verður tikið í størsta álvara hjá bretsku oljumyndugleikunum. Og nú føroyskir myndugleikar hava almannakunngjørt sína fyrstu útbjóðing kann hetta koma bretskum oljumyndugleikum illa við. Hinvegin kann sigast, at tað gongur ikki long tíð frá tí at bretar kunngera eina nýggja útbjóðing til loyvini fyriliggja. Teir hava ekspertisuna og royndir at avgreiða slíkt skjótt. Tískil eru enn møguleikar fyri, at ein bretsk útbjóðing kann verða latin upp og hildin, áðrenn tann føroyska. Tað ljóðar annars, at tað er ikki ósannlíkt, at útbjóðingarnar verða samtíðis.
