Nú verður ikki so leingi, til Húsareynstunnilin verður skotin ígjøgnum. Alt arbeiði verður gjørt norðanífrá, og alt tilfarið verður koyrt út í norðara enda við Villingadalsvegin. Tilfarið verður brúkt til vegaarbeiði við innkomuvegin og til útstykkingina av ídnaðarøkjum oman fyri Sandvíkarhjalla.
Tórshavnar býrá boðar nú frá, at í sambandi við at vegur verður gjørdur til munnan á Húsareynstunnlinum, er neyðugt at grava ríðibreytina av.
Arbeiðið byrjar í morgin. Tá ið arbeiðið er liðugt, verður ríðibreytin afturgjørd. Endurgerðin verður væntandi liðug 20. juli í summar.
– Fólk, ið ynskja at ganga ella renna á rossagøtuni, kunnu koyra út í Havnardal ella longur niðan á Oyggjarvegin fyri at sleppa framat Rossagøtuni, skrivar Tórshavnar kommuna.
