Testin, sum er ment av granskarum á Stavanger Universitetssjúkrahúsi í Noregi, vísir støðið av krabbameins-dna í blóðinum.
Tað veit norska kringvarpið NRK at siga í dag.
- Vit hava havt eitt gjøgnumbrot í okkara gransking, og vit hava funnið fram til nakað, vit halda kann leingja lívið hjá krabbameinssjúklingum.
Tað sigur professarin á Stavanger Universitetssjúkrahúsi, Oddmund Nordgård.
Granskararnir siga, at teir hava funnið arvaevnið til krabbamein í blóðinum, og hetta kann vísa, um ein viðgerð móti krabbameini virkar ella ei.
- Um viðgerðin ikki minkar um krabbameins-dna'ið, kunnu læknarnir royna eina aðra viðgerð.
Professarin, Oddmund Nordgård, sigur, at læknarnir nú fyrr í tilgongdini kunnu finna út av, um ein svullur veksur ella ei, og hetta sæst skjótari við nýggju testini enn við eitt nú røntgen ella myndadiagnostikki.
- Nýggi kanningarmøguleikin ger, at vit skjótari kunnu broyta viðgerðina. Hetta sparir sjúklingin fyri óneyðug hjáárin og leingir um lívið, sigur Oddmund Nordgård.
