Í kvøld klokkan 19.15 hittast bestu mansliðini hjá Neistanum og Kyndli til grannauppgerð í ítróttarhøllini á Hálsi í Havn, har í øllum førum heiður og æra standa upp á spæl, sjálvt um talan avgjørt ikki er um nakran toppdyst í Atlantic Airways-kappingini.
Neistin er eitt av fýra liðum, sum liggja mitt á stigatalvuni við seks stigum, og ikki kann sigast, at bláu greipuvinnararnir hava verið serliga sannførandi í síðstuni, so kanska hetta er ein dystur, har Kyndil, ið er niðast við tveimum stigum, veruliga kann arga og krúpa nærri hinum feløgunum.
Í bestu mansdeildini í flogbólti verður ein dystur spældur í annaðkvøld klokkan 19.45, tá ÍF í ítróttarhøllini á Kambsdali tekur ímóti Fleyr. Hetta er heldur ikki nakar toppdystur í Eikliguni hjá monnum, men allíkavæl ein dystur við stórum týdningi.
Higartil hava greipuvinnararnir í ÍF bara spælt tveir dystir, meðan argastu kappingarneytarnir hava spælt fimm, so nú stendur eftir at vita, hvør dugur er í fuglfirðingum, ið hava tapt annan og vunnið annan av spældu dystunum. Fleyr hevur vunnið ein dyst og tapt tveir, so umráðandi er eisini hjá havnarmonnunum at vísa, at teir eru frægari enn hetta, skulu teir blanda seg millum fremru liðini á stigatalvuni.
