Veðrið hevur verið útmerkað í Syðrugøtu alt kvøld, meðan festivalurin hevur verið í gongd. Ikki so mikið sum ein dropi hevur verið at merkt til stóra gleði fyri bæði festivalgestir og fyriskiparar.
Sum vera man er tað einans hósdagur enn, so øll fólkini eru ikki komin. Tað merkist væl á festivaløkinum, at her enn er heldur rúmligt, og at aktiviteturin enn ikki hevur rakt sítt maksimum. Hóast tað er gongd komin í teir ymsu básarnar so sum pannukøkubúðina, andlitsmáling og ymsu matstovurnar.
Nøkur útlendsk nøvn hava enn ikki fingið lent, m.a. Afenginn, sum skuldu havt spælt fyrr í kvøld. Hetta tykist ikki at níva festivalgestirnar tað stóra, og møtir man einans glaðum og vælnøgdum fólki. Kanska tí at tey føroysku nøvnini, ið spæla í kvøld so sum Byrta, Marius og Frostfelt, væl og virðiliga megna at lyfta byrðina hjá teimum útlendsku nøvnunum at veita góðan tónleik alt kvøldið.
