Tað var 16. desember í fjør – altso fyri einum góðum mánaði síðani – at vit spurdu tingfólk, um tey vildu ganga sum fyrimyndir og lækka sína egnu løn eitt nú fimm prosent.
Og tað vildu tey fegin. Ein stórur og greiður meiriluti segði, at hesum høvdu tey einki ímóti. Tí sjálvandi skuldu tey ganga sum fyrimyndir.
Og síðsta hósdag fingu tey høvið, tí undir aðru viðgerð av løgtingsfíggjarlógini legði Framsókn broytingaruppskot fram, har tey tóku hesi tingfólk upp á orðið – og skutu upp, at tinglønin lækkar fimm prosent.
Men nú vóru tað níggju tingfólk, sum ikki stóðu við tað, sum tey høvdu sagt við Sosialin – at tey vildu lækka lønina fimm prosent. Tey atkvøddu tí ímóti uppskotinum hjá Framsókn um at lækka lønirnar júst somu fimm prosent.
Meira kann lesast um hetta málið á síðu 6 og 7 í blaðnum í dag. Men vert er at hava í huga, at Sjálvstýrisflokkurin hevði júst sama uppskot frammi fyri góðum ári síðani – og Jógvan Skorheim, tingmaður floksins, vísti nettup á hetta, tá vit spurdu hann í desember, so sjálvandi var hann fyri hesum.
Men tá trýstast skuldi á knøttin hóskvøldið hugsaðu Jógvan Skorheim og hini níggju kanska meira um flatskattin, áðrenn tey trýstu á nei-knøttin...
