Fótbóltur
Ein av mongu áskoðarunum í Gundadali týskvøldið var Abraham Løkin, sum nú eisini er ein av hjálparvenjarunum hjá A-landsliðnum.
Meðan spenningurin í dystinum var upp á tað hægsta, fekk Rás2 orðið á hann. Millum annað vísti tíðindamaðurin á, at russisku spælararnir undan dystinum høvdu nevnt, at graslíkið kundi gerast ein trupulleiki hjá teimum. Men hesum var Abraham Løkin als ikki samdur í.
- Sjálvandi er tað ein fyrimunur fyri okkara spælarar, at teir spæla á einum undirlagi, sum teir eru vanir við. Men eg dugi slettis ikki at síggja, at hetta skal vera ein trupulleiki hjá russunum. Vøllurin her er veruliga góður at spæla á, og í Russlandi spæla teir nógvar av sínum dystum á graslíki, so eg dugi ikki at skilja tær atfinningarnar.
So tú vilt kanska kalla hetta fyri tað bera grenj?
- Grenj veit eg ikki. Men tað kann jú vera gott at skylda uppá, um tað nú skuldi víst seg, at dysturin ikki gongur eftir vild hjá teimum, staðfesti Abraham Løkin.
