Hvannasund: Tað er ikki nógv lív at hóma her á havnarlagnum um middagsleitið ígjár. Og hví skuldi tað eisini tað?!
Klokkan er farin av hálvgum eitt, og flestu fólk munnu sita heima við døgurðaborðini og eta.
Ein maður rokast umborð á strandfaraskipinum Másanum, men annars er eingin sál at hóma. Her átti at verið nógv lív, tí nógvir bátar liggja her og streymurin í batningi.
Í einum vindeyga sæst kortini ein maður standa og egna. So skjótt hann sær bilin hjá Sosialinum, Snoddi, tekur hann til beins og hvørvur í bili sínum. Men í einum øðrum egningarskúri stendur Karit so trúfastur og egnir. Hann er so ikki farin norður til heimbygdina at eta.
- Nei, eg tók ein matpakka við mær í dag, og so klári eg nakrar tímar aftrat, sigur hann, meðan hann so trúfast egnir góðu gágguna á línuna.
Hesa løtuna er hann kortini einsamallur í skúri. Men um eina løtu munnu hinir báðir starvsfelagar hansara fara at koma.
Allir egna teir hjá útróðrarbátinum “Olevina” sum er heimahoyrandi á Viðareiði. Sama morgun vóru teir afturkomnir við 5000 pundum.
Av sonnum ein góður dagur hjá útróðrarmonnum – og egnarum!
Gággan er best
Í hesum døgum er streymurin í batningi. Hann var uppá tað harðasta um vikuskiftið, men er nú minkandi og verður av tí besta um vikuskiftið.
Mikunáttina var av besta veðri, og tá fóru teir á Olevinu til útróðrar við íalt 34 stampum. Í gjáramorgunin komu teir at landi aftur við góðum fongi.
Olevina liggur við bryggju her í Hvannasundi, so stuttur vegur er at fáa stamparnar umborð aftur, tá farast skal á næsta túrin.
- Teir søgdu frá góðum fiskiskapi í nátt. Serliga gott var tað, at eini 4000 pund av veiðuni vóru toskur, greiðir royndi egnarin frá.
Í løtuni egna teir mest við gággu og nakað av høgguslokki eisini. Tað vísir seg, at gággan er kortini hon, sum roynist best.
Koyrdur í skrell
Í sínum langa lívi hevur Karit roynt mangt og hvat innan vinnuligt virksemi, bæði heima og úti.
- Eg havi siglt úti í verðini, eg havi verið fiskari, arbeitt á smoltstøð – og nú eri eg so endaður her.
- Tað er næstan so, at man sleppur framat her í egningini, áðrenn man verður koyrdur í skrell. Tja, hetta er líkasum innspurturin, sigur hann við einum stórum brosi.
Hóast henda “veruleika” so er Karit sannførdur um, at egningin er eitt sera gott arbeiði fyri eldri fólk.
Tað er helst so sum Karit tekur til: - So sleppur ein undan at ganga heima og keða seg!
Nógvur fiskur
Í egningarskúrinum hjá Olevinu eru teir vanliga einir 3-4 mans.
- Í dag eru vit so bara tríggir, men her koma ofta dreingir at egna sær nakrar stampar, sigur Karit.
Hjá teimum eldru er stuttligt at eygleiða, hvussu óførir og kvikhentir hesir ungu dreingirnir er at egna ein stampa.
- Tað er bara ein lítil løta, so hava hesir ungu knassarnir egnt ein stamp. Slíkar løtur vísir tað seg, sum um vit eldru bara hanga uppií teimum, sigur hann.
Honum dámar sera væl at arbeiða her, tí, sum hann sigur tað so gott: - Ein sær úrslit av tí, sum ein ger!
- Tað besta við tí er, tá teir fara til útrógvar við línu og koma aftur við nógvum fiski. Tá sær ein greitt, at her er talan um dugnaligar egnarar, sigur Karit.
Ein annar egnari er nú komin í skúrin at egna, og hann er púra samdur við honum í hesum: - Sum tú tó kanst siga tað!
Ójøvn stødd
Fyrrapartin í gjár var Karit tíðliga á fótum eins og hann er vanur. Longu klokkan seks var hann á sínum plássi í egningarskúrinum.
- Eg plagi at fara til hús um fýratíðina, og tá man eg eisini hava egnt fyri meg, sigur hann.
Stamparnir eru ójavnir í longd, summir eru 300 favnar og aðrir 250 favnar. Vanliga megnar hann at egna 10 stampar uppá ein dag.
- Vit fáa sjálvandi meiri fyri teir longru stamparnar!
Prát og gestir
Tað er eitt serstakt tosingarlag og eitt serligt umhvørvi í einumhvørjum egningarskúri. Soleiðis er eisini í hesum skúrinum á havnarlagnum í Hvannasundi.
Karit dámar sera væl at koma higar í skúrin, tí her eru so nógvir áhugaverdir menn sum egna og teir fáa altíð eitt gott prát saman.
- Tað vísir seg eisini, at hetta er væl umtókt stað hjá øðrum monnum eisini. Her koma allatíðina menn ikki til eitt prát, sigur hann.
Nógvir teir eru sjálvir útróðrarmenn ella sjómenn, og vita tí altíð okkurt at siga, annaðhvørt talan so er um veður og vind ella fiskiskap.
FAKTA
Olevina, Klaksvík 716
Fyrrverandi nøvn: Karin, 2003 (FD 92 – Toftir), Karin, 2000 (Klaksvík 716 – Klaksvík), Karin (FD 329), Christina (TN 372)
Heimstaður: Viðareiði
Smíðistaður: Esbjerg, Danmark í 1971
Tilfar: Eik/bók
Stødd: Longd 13,72 m; breidd 4,3 m og dýpd 1,74 metrar.
Eigari: sp/f Olevina, Viðareiði
Útgerðarmaður: Óli Sørensen, Viðareiði
