Ein eins fastur táttur og sjálvur Jazzfestivalurin er eitt gospelkvøld á sama festivali. Ofta hevur hetta gospelkvøldið verið eitt hóskvøld og soleiðis er eisini í ár.
Í kvøld verður høvuðsnavnið á Tórshavnar jazz-, fólka- og bluesfestivali nevniliga Stavanger Gospel Choir, ið telist millum bestu gospelkór í Noregi.
Tjúgu sangarar og tónleikarar eru við kórinum, sum fyrr í ár hevur verið á konsertferð í London og Hollandi.
Kórið er kent uttan fyri Norra og á millum øðrum fleiri týskum tónleikaheimasíðum ber til at keypa fløgur hjá kórinum.
Stavanger Gospel Choir framførir í konserthøllini í Norðurlandahúsinum klokkan tíggju minuttir yvir tíggju í kvøld.
Fyrr um kvøldið verður konsertsalurin fyltur við svingandi bigbandtónum frá danska Swinging Link.
Hetta er eitt lítið bigband úr Hjørring, ið millum annað eisini nýtir ljómborð til at fylla út í ljóðmyndini.
Kvøldið í kvøld byrjar annars við einari vestnorðurlendskari blanding av jazztónleikarum, ið fara at spæla løg hjá Louis Armstrong í forhøllini í Norðurlandahúsinum.
Bólkurin er mannaður við tveimum dønum, tveimum grønlendingum og tveimum íslendingum umframt av Brandi Øssurssyni, ið eisini er høvuðsfyrireikari av Jazzfestivalinum.
Hini bæði nøvnini á skránni í kvøld eru Trevor Hunter Folk Duo úr Hetlandi og Kurts Blues Band úr Ålandi.
Fyrstu tónarnir í Norðurlandahúsinum í kvøld verða blástir klokkan hálvgum átta.
