Tær seinastu vikurnar hevur russiski forsetin, Vladimir Putin fingið nógvar ákoyringar orsakað av tí, sum er hent í Ukraina. Men heilt einsamallur er Putin ikki, tí í dag fekk hann stuðul frá seinasta forsetanum í gamla Sovjetsamveldinum.
Sambært tíðindstovuni Interfax sigur Mikhail Gorbatjov tað vera rætt, at Krim verður partur av Russlandi.
-Hetta hendir, tí tað er fólksins vilji, sigur Gorbatjov við Interfax.
Gamli sovjetleiðarin vísir á, at fólkið á Krim bleiv ikki spurt, tá Nikita Khrusjtjov skipaði Krim sum part av Ukraina í 1954. Nú er mistakið rættað, sigur hann.
-Vit eiga at fegnast um avgerðina hjá fólkinum á Krim heldur enn at seta tiltøk í verk, sigur Gorbatjov og sipar við hesum til tiltøkini, sum ES og USA hava sett í verk.
ES samtykti í dag at seta tiltøk í verk ímóti 21 politikarum og hernaðarleiðarum í Russlandi og Ukraina. USA hevur sett tilsvarandi tiltøk í verk ímóti 11 russum og ukrainum.
