Skiparin á frystilínuskipinum Kambi, Mortan Mortensen á Eiði, er royndur í leikum, og hann er ein rættilig fiskiklógv. Við einum veiðivirði í ár á 31,7 miljónir krónur hava hann og manningin hansara gjørt eitt gott ár.
- Tað, sum nú liggur fyri framman, er Flemish Kap. Vit fóru yvir hagar 2. januar í ár, og vit ætla okkum at fara yvir aftur somu tíð eftir ársskiftið komandi. Vit høvdu góðan túr yvir seinast og brúktu hálvt áttanda samdøgur. Ferðin kann ikki gerast skjótari enn tað, sigur Mortan Mortensen.
Kambur var heima í Føroyum aftur eftir tveir góðar túrar á Flemish Kap umleið 20. februar.
Kappingarneytin hjá Kambi, um vit so kunnu siga - frystilínuskipið Klakkur - loysti úr Føroyum hin 30. desember í fjør, tá teir løgdu leiðina yvir á Flemish Kap, men hesaferð er ætlanin at loysa sama dag sum Kambur, nevniliga 2. januar.
Onnur frystilínuskip fara eisini yvir á Flemish Kap eftir jólahøgtíðina, og millum hesi eru Ågot og væntandi eisini Eivind. So er spurningurin, um okkurt ísfiskalínuskip eisini hættar sær yvir á Flemish Kap hesaferð, tá teinurin er so langur. Royndirnar, sum ísfiskalínuskip hava gjørt sær har yviri, eru misjavnar.
Mortan Mortensen, skipari á Kambi, sigur, at tað hevur gingið væl hjá teimum at mannað skipið - ikki minst, síðan teir fóru at frysta veiðina umborð, og møguleikarnir at reka línuveiði gjørdust betri.
- Jú, tað hevur gingið væl at mannað skipið, og vit hava støðuga og góða manning. Eg skal ikki siga, at onkur maður ikki hevur vantað onkran einstakan túr um summarið, men hetta hevur als ikki verið nakar trupulleiki.
Skiparin sigur, at tað hevur gingið ógvuliga væl hjá teimum at hildið upp á fólkið, og tað hevur stóran týdning, bæði fyri skip og manning.
