UNDIR GØTUEIÐI
Ein av minstu bygdunum ella býlingunum í Eysturkommunu er bygdin Undir Gøtueiði, sum liggur við Skálafjørðin, beint innanfyri Skipanes. Markið millum Skipanes og Gøtueiði og samstundis markið millum Eysturkommunu og Runavíkar kommunu er Eiðisá.
Undir Gøtueiði eru tilsamans 12 sethús, men í einum teirra búgva tvær familjur.
Ein av teimum, sum er uppaksin Undir Gøtueiði og altíð hevur búð her, er 67 ára gamli, Regin Joensen.
Hann veit at siga, at bygdin Undir Gøtueiði er frá 1852, og í nógv ár var hon partur av Nes sókn. Men fyri meiri enn hundrað árum síðan gjørdist bygdin partur av gomlu Gøtu kommunu. Tá ið Gøta og Leirvík so løgdu saman í Eysturkommunu nøkur ár herfyri, gjørdist Gøtueiði náttúrliga ein partur av hesi kommunu.
Tá Regin var smádrongur, vóru fimm hús Undir Gøtueiði, og tó at bygdin ikki er vaksin tað heilt stóra, búgva kortini fleiri fólk her í dag.
Elstu húsini
Regin Joensen veit at siga, at nøkur grundøkir eru tøk í bygdini, og tí er ikki óvist, at ikki onkur sethús fara at koma aftrat, sum árini ganga.
- Vit bygdu okkum hús Undir Gøtueiði í endanum av sekstiárunum, men fyri nøkrum árum síðan keypti eg gomlu húsini, sum fyrstu niðurseturfólkini bygdu. Hesi havi eg sett í stand, og í august mánaði í fjør fluttu vit inn. Vit eiga trý børn. Tvey búgva í Havn og dóttirin, sum býr her heima, flutti inn í húsini, sum vit á sinni bygdu okkum.
Hann sigur, at bæði pápi hansara, Alexander og abbin, Rasmus, eru ættaðir úr hesum húsum, sum nú eru sett í stand og aftur eru bústaður.
- Upprunaliga vendu húsini oman og niðan, men abbi mín bygdi uppí tey suðureftir og vendi teimum soleiðis suður og norður. Hetta var fyrst í 1900-talinum.
Regin heldur, at orsøkin til, at húsini vendu oman og niðan er, at hetta kravdi minni útgrevstur, samstundis sum kjallari fekst til kúnna.
- Tey seinnu árini búði ein gamal drongur í hesum húsum. Hann búði mest hjá beiggja sínum, og tá beiggi hansara doyði, flutti hann inn har.
Hann veit eisini at siga, at hin fyrsti, sum fyri meiri enn 150 árum síðan búði í hesum húsum, kom úr Syðrugøtu, hin næsti kom av Skála – og hin triði úr Kunoy.
- Teir giftust inn her, leggur hann aftrat.
Áttu borgarstjóra
Vit spurdu eisini Regin Joensen, hvussu tað er at vera ein so lítil partur av eini miðalstórari kommunu, sum gamla Gøtu kommuna var – og nú eini lutfalsliga stórari kommunu, sum Eysturkommuna er.
- Eg haldi ikki, at hetta hevur riggað so galið. Tað er nú ikki bara Gøtueiði, sum er ein so lítil partur av kommununi. Gøtugjógv er eisini ein lítil partur, og síðan er hin minsti parturin ella býlingurin av Eysturkommunu Effo-støðin í Skálafirði og eini sethús, sum liggja beint sunnanfyri støðina. Tað er hesi húsini, sum bilasølumaðurin, Jóhannes Berg, eigur. Tað var Júst í Túni, sáli, sum bygdi hesi húsini, meðan hann fekst við aling í Skálafirði.
Hann heldur, at bygdin Undir Gøtueiði hevur verið rímiliga væl fyri í kommununi, og hetta kemst kanska ikki minst av, at bygdin hevur átt borgarstjórar og bygdaráðslimir í fleiri ár.
- Vit hava eisini havt umboð í kommununi, síðan samanleggingina í Eysturkommunu, men í setuni, vit nú eru í, hava vit einki umboð, sigur Regin Joensen.
