Hevur tú hug at gerast partur av Ung í Arbeiði í summar?
Tað er spurningurin, sum tey í Klaksvíkar kommunu seta í dag.
Mikukvøldið hin 15. juni bjóða Ung í Arbeiði í Klaksvíkar kommunu til forvitnisligt tiltak fyri ungdómum, sum fara til arbeiðis fyri fyrstu ferð.
- Vilt tú vita, hvat tú kanst arbeiða við í summar? Ivast tú í, hvat verður væntað av tær, tá tú fert til arbeiðis?
Um hetta eru spurningar, tú situr við, ert tú vælkomin í Finastøðina, har tú kanst fáa svar.
- Tiltakið í Finastøðini byrjar klokkan 20, og øll eru vælkomin, eisini foreldur, siga tey í Klaksvíkar kommunu í dag.
Sambært skránni fyri tiltakið fer Jógvan Kallsgarð, samskipari, í stuttum at greiða frá, hvussu Ung í Arbeiði virkar, og hvat arbeitt fer at verða við í summar.
Absalon Hansen, formaður í Klaksvíkar arbeiðsmannafelag, fer at greiða frá, hvat eitt fakfelag er, og um hvørji rættindi og skyldur, ein arbeiðstakari hevur.
Beinta Á. Gregersen, leiðari í Húsinum, fer at fortelja um, hvat ein arbeiðsgevari ynskir av sínum starvsfólkum.
