Tá Sandoyartunnilin letur upp fyri ferðslu, fer tað at kosta tað sama at koyra ígjøgnum Sandoyartunnilin í persónbili, sum tað kostar at koyra millum Eysturoynna og Streymoynna ígjøgnum Eysturoyartunnilin.
Hesum boðar stjórin í P/F Eystur-og Sandoyartunlar, Teitur Samuelsen, frá í morgun. Tað merkir, at persónbilur uttan hald fer at kunna koyra ígjøgnum Sandoyartunnilin fyri 175 krónur, og við haldi verður kostnaðurin 75 krónur hvønn vegin.
Meira kunning um prísirnar kann lesast á www.tunnil.fo. Teitur Samuelsen vísir á, at avsláttarskipanin fyri Eystur- og Sandoyartunnilin er serskild fyri hvønn tunnil sær.
- Frá 1. februar 2023 verða prísirnir fyri leigubilar at koyra í gjøgnum Eysturoyartunnilin samstundis tillagaðir, leggur tunnilsstjórin aftrat í stuttum tíðindaskrivi í morgun.
