Fótbóltur
Tað var ongan tíð ætlanin hjá Hans Pauli Samuelsen, at hann skuldi í rættin at vitna móti Predrag Prsic.
- Eg tók mær ikki stórvegis tikni av hendingini. So hart rakti hann meg heldur ikki, og eg spældi jú eisini seinastu minuttirnar av dystinum. Í felagnum tosaðu vit um hendingina, men samdust um, at hatta gjørdu vit ikki meira við. Tað er jú so nógv, sum gongur fyri seg í einum dysti, men tá dysturin er av, er hann av. Og tá hugsi eg í øllum førum ikki meira um tað, sum er hent, segði Hans Pauli.
Um sjálva hendingina segði hann annars, at hann ongan tíð hevði í hyggju at provokera venjaran.
- Eina ferð fyrr í dystinum var ein spælari hjá teimum skaddur. Meðan hann fær viðgerð, kallar fysioterapeuturin hjá teimum meg fyri racist, og tað irriteraði meg. Og tað var mótvegis honum, at eg vendi mær, tá vit høvdu skorað. Eg rann móti beinkinum og klappaði móti honum, og tað var tað. Restin hendir, meðan eg eri á veg burtur frá hendingini, segði Hans Pauli.
Hann viðgekk tó, at atburðurin, sum hann hevði sýnt, kundi uppfatast provokerandi.
