Samtak krevur, at gjøgnumskygni kemur í bankasøluna, og at ein óheftur kanningarstovnur verður settur at útgreina, tað ið farið er fram higartil í málinum. Samstundis undrast Samtak á ta løgnu mannagongd við søluni av listaverkunum. Listaverkini, sum landið átti, skal landið nú keypa fyri fleiri milliónir krónur – hetta tykist heilt løgið.
Tað standa nógvir ósvaraðir spurningar, sum serliga landsstýrið og fíggingargrunnurin eiga at svara; – men fyrst og fremst vantar gjøgnumskygni.
Felagið heitur á landsstýrið um at steðga við øllum einskiljingum til hetta kann gerast á rætta hátt almennu føroyum at gagni. Álitið sum fakfeløgini hava á landsstýrið og politisku skipanina í hesum máli hevur í øllum føri fingið eitt álvarsamt skot fyri bógvin.
Ein spurningur er eisini, hví kundu føroya fólk ikki fingið partabrøv til gávis? Tað eru verri enn so øll fólk í Føroyum, sum høvdu møguleikan at keypa sín part í bankanum. Fólkið hevur rindað fyri bankan minst einaferð.
Gjøgnumskygni er minsta krav!
