Ein dystur hevur verið spældur í næstbestu deildini hjá monnum í fótbólti. Dysturin var í Hoyvík, har Giza Hoyvík tók ímóti ÍF. Udan dystinum hevði ÍF vunnið báðar dystirnar í deildini, meðan Giza Hoyvík í tveimum teimum fyrstu dystunum var farið av vøllinum uttan stig.
Men gongdirnar hjá báðum liðunum vóru broyttar eftir dystin í kvøld. Giza Hoyvík fekk nevniliga fyrsta stigið í hesum kappingarárinum, meðan ÍF fyri fyrstu ferð fór av vøllinum hetta kappingarárið uttan at vinna. Dysturin endaði við 1-1 javnleiki.
Bæði málini komu í fyrra hálvleiki. Fyrst var tað Dánjal á Lakjuni sum legði ÍF á odda 1-0 eftir hornaspark, men stutt fyri hálvleik eydnaðist tað Giza Hoyvík at javna, tá Jóhan Hansen kom at standa púra fríur, eftir at Óli Restorff Hansen hevði lagt upp.
Í seinna hálvleiki lá tað meira í luftini at ÍF fór at fáa mál, heldur enn at Giza Hoyvík fór at fáa mál, men sum hálvleikurin leið fánaði trýstið hjá fuglfirðinum alsamt burtur. Tí endaði dysturin við 1-1 javnleiki.
Tað er ógvuliga javnt í oddinum av 1.deild. ÍF, KÍ og NSÍ liggja øll lið um lið við sjey stigum – síðani koma B68 og Víkingur við seks stigum sum ávikavist nummar fýra og fimm, og jøvn í stigum sum nummar seks, sjey og átta eru Skála, B71 og HB, sum øll hava trý stig. Næstaftast er Giza Hoyvík við einum stigið, og aftast í deildini eru Suðuroyingar, sum enn einki stig hava fingið.
Giza Hoyvík – ÍF 1-1 (1-1)
0-1 Dánjal á Lakjuni
1-1 Jóhan Hansen
