Eitt talsfólk fyri Hamas sigur, at hann ikki longur er áhugaður í einari vápnahvíldaravtalu við Ísrael. Talsfólkið er Basem Naim, og tað er tíðindastovan, AFP, sum endurgevur.
- Tað gevur onga meining at fara undir samráðingar ella umhugsa fleiri vápnahvíldaruppskot, so leingi hungurs-og týningarkríggj halda fram í Gazageiranum, sigur hann.
Hann eggjar heimssamfelagnum til at leggja trýst á ísraelsku stjórnina fyri at steðga krígsbrotsverkunum við svongd, tosta og drápum, sum hann tekur til.
Mánadagin gjørdist tað kent, at ísraelska stjórnin hevur góðkent eina ætlan um at víðka átøkini í Gazageiranum og vísa íbúgvunum butur úr ávísum økjum.
