Sáttmáli
Hoyvíkssáttmálin, sum er sáttmálin millum Føroyar og Ísland við teimum fýra grundleggjandi frælsunum fyri vørur, tænastur, kapital og fólk, er til politiska viðgerð í uttanlandsnevndini.
Ætlanin hjá løgmanni og landsstýrinum er, at allar tær skyldur, sum Føroyar við sáttmálanum koma at hava mótvegis Íslandi, verða avgreiddar á tann hátt, at sjálvur sáttmálin verður gjørdur til lóg.
Hetta er ein "teknikkur", sum politiskt hevur verið funnist at, tí sáttmálin við hesum verður hevjaður yvir allar aðrar galdandi lógir, sum kunnu hava týdning í viðurskiftunum millum Føroyar og Ísland.
Tá ið sáttmálin er samtyktur á tingi, kann ein íslendingur, sum kemur til Føroya, við sáttmálanum í hondini vísa á, hvørji rættindi hann hevur í Føroyum.
Her standi eg!
Vit kunnu taka eitt tilvildarligt dømi:
Sum er, kann ein íslendingur ikki reka ein biograf í Føroyum, tí her krevst, at hann er danskur ríkisborgari við bústaði í Føroyum.
Tá ið Hoyvíkssáttmálin er vorðin lóg, kann íslendingurin standa við sáttmálanum í hondini í Føroyum og siga, at hann hevur hesi rættindi líka mikið, hvat ein onnur lóg sigur.
Og soleiðis verður tað allan vegin ígjøgnum og ikki minst, tá ið talan er um sonevndar tekniskar handilsligar forðingar.
Orsøkin til, at løgmaður og landsstýrið vilja gera sáttmálan millum Føroyar og Ísland til lóg, er, at vit hava ein hóp av lógum í Føroyum, sum skulu broytast, um íslendingar skulu fáa tey rættindi í Føroyum, sum sáttmálin leggur upp til.
Hetta er lættari sagt enn gjørt í eini handavending, og ikki er vist, at onkur lóg tá ikki liggur eftir, sum ikki er broytt samsvarandi sáttmálanum.
Eingin "feilur"...
Á henda hátt, heldur løgmaður, at vit best kunnu avgreiða tær skyldur, sum Føroyar koma at hava mótvegis Íslandi og við at gera sáttmálan til lóg, koma vit heldur ikki at gera nakrar "feilir", sum fólk, ið standa málinum nær, taka til.
Sambært stýriskipanarlógini, grein 55, verður sáttmálin, tá ið hann er samtyktur á løgtingi, soleiðis ein binding yvirfyri Íslandi.
Løgmaður heldur soleiðis, at vit í fyrsta lagi eiga at binda okkum yvirfyri Íslandi, í øðrum lagi binda vit okkum inneftir, og í triðja lagi mugu vit fremja neyðugu lógarbroytingarnar í einstøku lógunum, sum stríða ímóti sjálvum sáttmálanum millum Føroyar og Ísland.
