- Eg haldi, at fólki dámar væl at tey kunnu heita á eina einstaka fyritøku, sum kann gera alt hetta fyri tey.
- Vit gera alt frá A til Z, og hava í øllum førum nóg mikið at gera, sigur Mortan Justesen, leiðari í fyritøkuni Hús- & Garðsrøkt.
Teir leggja seg eftir smærri arbeiðum, og átaka sær tí ikki størri timburarbeiði, so sum at byggja sethús og líknandi.
- Aðrir vilja heldur hava størri arbeiðir at gera, meðan vit leggja okkum eftir øðrum arbeiðum.
- Vit meta at hetta við røkt og viðlíkahaldi av húsum var eitt forsømt umráði. Og í dag kunnu vit bara staðfesta, at tað var rætt, sigur hann.
Arbeiðsøki teirra er fyri tað mesta í Eysturoynni, men teir eru at finna kring ein stóran part av landinum.
Borimaskina og hamari
Tað ælar av grimd henda týsdagin í farnu viku, tá umboð fyri tíðindatænastuna vitja á Selatrað.
Lítið fólk er at síggja úti, tí ælini eru bæði frek og drúgv. Men við eini hús – á Selatraðarvegi 877 – sæst ein maður í arbeiðsklæðum ganga.
Hann hevur sett stigan uttanfyri og upp á takið. Og í hondini er ein borimaskina og ein hamari.
Maðurin er Mortan Justesen av Morskranesi, sum í løtuni er í ferð við at umvæla hesi húsini norðarlaga í bygdini.
Hann er væl ílatin til høvið, men ælini tykjast forða honum í at fremja arbeiðið sítt uttandura. Men “i dagens anledning” verður meiri arbeitt í kjallaranum.
Húsini krevja ábøtur av ymiskum slagi. Og tað er júst slíkt, sum er eyðkenni fyri fyritøku hansara: At teir kunnu gera flestøll arbeiðir fyri fólk.
Stórar og smærri uppgávur
Heimstaðurin hjá Hús- og Garðsrøkt er sum nevnt Morskranes, men virksemið hjá felagnum er meiri víttfevnd enn so.
- Vit hava arbeitt á nógvum støðum, men hava roynt at hildið okkum í Eysturoynni fyri tað mesta, sigur Mortan.
Ikki tí, - teir hava kortini loyst stórar uppgávur í høvuðsstaðnum, og hava framvegis fastar bygningar at halda har.
Teir hava havt rættiliga nógv arbeiði síðani teir byrjaðu, men hava kortini roynt at avmarka tað eitt sindur.
Tí, sum Mortan sjálvur sigur:
- Vit vilja heldur ikki hava so nógv, at tað gongur út yvir tað sum vit skulu røkja.
- Tí verða tað ikki so øgiliga nógv hús aftrat, sum vit taka uppá okkum. Vit hava nærum nóg mikið sum er, sigur Mortan.
Alt, gott og bíligt
Hóast talan er um eina fyritøku, sum kann hava nógv jørn í eldinum samstundis, er talan kortini ikki um eina fyritøku við nógvum fólki í arbeiði.
Talan er í roynd og veru um eina familjufyritøku. Teir hjálpa hvørjum øðrum tá á stendur – tveir synir hansara, ein versonur og ein abbasonur.
- Eingin vil gjalda meiri enn neyðugt fyri eitt arbeiði, og tí hava vit verið sera lagaligir í prísi.
- Er talan um ein regndag og vit fáa ikki arbeitt uttandura, so er keðiligt hjá fólki at allir skulu hava sína løn. Vit hava heldur lagt okkum eftir at kunna gera alt, og at gera tað bíligt.
- Á tann hátt, fáa bæði vit og tey nakað burtur úr tí, sigur Mortan.
Ein hjálpandi hond
Tá Mortan legði til brots við fyritøku síni, hugsaði hann í fyrstu syftu um at veita eina ávísa tænastu. Henda vendi sær til tey sum eiga hús og garðar, men sum kanska ikki orka at halda ella røkja hetta.
- Hesi ynskja kortini hava tað hampiligt rundan um húsini. Og her koma vit so inn og bjóða teimum eina hjálpandi hond.
Teir hava sum nevnt loyst ein hóp av ymiskum uppgávum í hesum sambandi, bæði stórar og smáar.
Ein kann ringja og biðja um hjálp, tí at eitt vask er tipt. Ein annar kann ringja og biðja teir festa eina takrennu, sum er vorðin leys.
- Tað kunnu vera øll hesi ymisku smáttarí’ini – at ein rútur er brotin ella ein hurð sum lekur. Ella tey stóru, at pussa eini heil hús, umvæla ein køk ella tetta ein kjallara.
- So tú sært, at vit hava eitt sera fjølbroytt arbeiði.
Seinasta finish’ið
Týsdagin í farnu viku var Mortan einsamallur til arbeiðis í einum húsum á Selatrað.
Húsini, sum ein maður ið er komin nakað til árs eigur, trongdu til ábøtur. Hesin ynskti, at Mortan tók eina hond í hesi húsini.
- Ja, eg havi í øllum førum fingið tann heiður at gera hetta arbeiðið. Her hevur verið rættiliga nógv at gjørt, men nú fer at líða væl.
- Vit hava gjørt alt fyrireikingararbeiðið nú. Og tá vit koma fram móti sumrinum fáa húsini tað seinasta finish’ið við máling og tílíkum, greiðir Mortan frá.
Tá Mortan og hansara menn eru lidnir við hetta arbeiðið, liggur nógv arbeiðið fyri framman. Í roynd og veru hava teir nóg mikið til restina av árinum.
- Eg vil siga tað á ein annan hátt: Vit hava so nógv at gera, sum vit vilja taka inn.
- Vit royna ikki at átaka okkum so nógv arbeiðir, at vit skuffa tey fólkini sum bíða eftir okkum. Vit halda tað sum vit lova, staðfestir Mortan.
Hann hyggur út fyri dyr, men hann sær bert enn ein grovan æling fara framvið.
- Nei. Í dag er ikki hugsingur um at gera nakað uttanfyri!
Gott timbur til trappur
Ein partur av arbeiðinum hjá Mortani var at leggja nýtt timbur á trappurnar.
Til hetta nýtti hann eitt serligt – og serliga gott – slag, nevniliga asiatiskt mahogni sum hann fær til keyps í Timburhandlinum í Runavík.
- Hetta forgongur ikki, og er heldur ikki so øgiliga dýrt. Og so er tað haraftrat gott at arbeiða við, greiðir Mortan frá.
Hetta asiatiska mahogni’ið er sera vælegnað á støðum har ein skal ganga og ikki glíða.
Mortan hevur m.a. lagt hetta timbrið á eini stóra terassu á Strondum. Lætt er hjá fólki at halda hetta, og skal heldur ikki røkjast nakað serligt.
- Tímir ein at vaska tað við grønsápu eina ferð um árið, so er tað mettað við sápu, sigur hann.
Frá Peri til Mortan
Mortan hevur sjálvur sína egnu fyritøku, ið hann nevnir Hús- og Garðsrøkt.
Her er talan um eina fyritøku sum er til reiðar at hjálpa fólki við øllum sløgum av handaligum arbeiðum.
- Ja, her er veruliga talan um eina multi-tænastu, staðfestir Mortan.
Millum tær mongu tænasturnar er røkt av summarhúsum, gera urtagarðar fyri fólk, pussa húsagrundir, máliarbeiði og timburarbeiði. Teir hava eisini tapetisera og mála heima hjá fólki.
- Og vit hava enntá sligið grasplenur hjá fólki, og gjørt hundrað onnur ting.
Líkt er til, at fólki dámar væl at hava við eina fyritøku at gera, soleiðis at tey sleppa undan at renna frá Peri til Pól - til ein málara, elektrikara, múrara, rørsmið, urtagarðsmann og aðrar at gera smærri arbeiðir inni í einum húsi.
- Tað vísir seg at rigga væl, og eg haldi eisini at fólk eru sera fegin um tað, staðfestir Mortan.
