GBOB 2009 er nú liðugt, og vinnari av heimsfinaluni gjørdist enski Floors and Walls. Lady Fire endaði millum 6 teir bestu á einum deildum 5. plássi saman við Skotlandi
Ensku Floors and Walls spældu energiskan, rútmiskan riff-baseraðan rokk og struku avstað við 1. plássi. Powerage úr Australia blivu nummar 2, Japanski gentubólkurin Pinky Piglets fekk 3. pláss, og nummar 4 gjørdust írsku Baby Jenx.
Jón Tyril, fyriskipari av føroysku GBOB kappingini, er á staðnum og sigur, at hann frammanundan var heilt vísur í, at Lady Fire fóru at enda millum seks teir bestu bólkarnar.
- Støðið var nógv hægri í dag, enn tað var í gjár. Og tað hevur faktiskt eisini verið hægri í ár, enn tað var í fjør, greiðir Jón Tyril frá.
- Lady Fire stóðu út sum nakað serligt og hava fingið ordiliga góðan respons. Tað er feitt at fáa eina plasering, og teir kunnu bara vera glaðir fyri framførsluna. Tað hava verið nógv fólk til tiltakið, meira í kvøld enn í gjár. Haldi eisini, at tað hava verið fleiri bransjufólk við í ár enn hini árini.
Lady Fire vóru einasti norðurlendski bólkurin, sum fekk eina plasering. Sambært Jón Tyril stóð íslendski bólkurin Agent Fresco seg sera væl.
- Teir spældu eitt slag av tekniskum dómsmetallið. Nokso melodiskt og ógvusligt, og tónleikararnir eru klassiskt vændir, sum eisini hoyrist í tónleikinum. Teir vóru ordiliga góðir, og tað undrar meg, at teir ikki fingu nakra plasering.
- Yvirhøvur er Føroyar tað landið av øllum norðurlondunum, sum hevur klárað seg nógv best í GBOB kappingini. í 2005 blivu vit nr. 6, nr. 1 í 2007, og hesaferð nr. 5. Tað er ótrúliga væl klárað.
Les meira á www.gbob.com
