Mikudagin skipaðu foreldraráðiðini fyri barnaøki 0-6 ár í Miðvági fyri garðdagi í nýggja barnagarðinum á Stórutrøð, har foreldur og systkin vórðu bjóðað til eina hugnaløtu. Eisini var máliarbeiði og grilling á skránni.
Sum kunnugt er 2011 kosið at verða kostár, og í hesum sambandi hava tey á barnaøkinum í Miðvági arbeitt serliga við hugtakinum »kostur«. Tey elstu børnini í Heiðastovu hava í nakrar vikur arbeitt við at gera ein pinnaleik um sunnan og ósunnan kost, og hendan dagin fingu tey høvi at framføra hann fyri foreldrum og systkum.
Kulissan var ein stórur reyður munnur við stórun hvítum tonnum. Aftanfyri stóðu børnini við ymiskum leiklutum, sum umboðaðu sunnan kost mótvegis ósunnum kosti.
Endamálið við leikinum var at læra børnini týdningin av at eta sunnan kost. Hetta hevur verið ein lærurík og stuttligt tíð fyri børnini. Tey hava verið við í allari gongdini. Tey hava sjálvi valt hvønn leiklut tey vildu vera og verið við at skriva søgugongdina. At børnini sjálvi sleppa at vera við at mynda leikin og síðan framføra leikin, hevur verið sera avbjóðandi og gevandi fyri tey.
