Tey gjørdust ikki sørt bilsin í handlinum Gamal og Nýtt í Klaksvík, tá tey nú ein dagin funnu ein gamlan Waagstein málning í eini bingju, sum kom úr Danmark
Málningurin eftir kenda listamannin Jógvan Waagstein er frá 1937, og kom hann undan kavi í eini bingju, sum Danmissión hevði sent handlinum Gamalt og Nýtt í Klaksvík, veit heimasíðan hjá Norðlýsinum at siga.
Undangongumaður
Hvussu málningurin eftir Waagstein er komin í bingjuna, vita tey í handlinum ikki, men tey vísa á, at Danmissión ofta tømir íbúðir og sethús eftir deyðsbúgv, og helst er hesin málningurin á henda hátt endaður í Klaksvík.
Málningurin, sum er 69x40 sentimetrar við rammu, sýnir royndarstøðina í Hoyvík, har Fornminnissavnið er nú, við Glyvursnesi í baksýni.
Jógvan Waagstein (1879-1949) var ein av undangongumonnunum í føroyskari myndlist. Ofta bera hansara málningar brá av franskari impressionismu, har málarin fer út í nátturuna at leita upp vøkur útsýni. Við málningum eftir Waagstein og hansara nýskapandi javnaldrum, sóðu føroyingar á fyrsta sinni listarligar lýsingar av sínum egna landslag, sum gjørdist megintema í føroyskari myndlist í 20. øld.
Á uppboðssølu
Norðlýsið boðar frá, at um onkur hevur hug at geva eitt boð uppá málningin, so ber til at støkka inn á gólvið í Gamalt og Nýtt, har málningurin verður sýndur fram.
Eisini ber til at senda eitt boð yvir teldupostin til Norðlýsið, sum síðani verður sent víðari til Gamalt og Nýtt.
Teldupostadressan er nordpres@olivant.fo
Minstaboð er 16.000 krónur
