- Tað er ikki bara fiskimenninar og skiparaskúlan, sum vit stuðla, men Skagen í síni heild.
Tað siga tær tríggjar tænastufyritøkurnar í Skagen, sum herfyri lótu skúlanum tríggjar kontantar peningagávur á 10.000 krónur hvør.
Fyritøkurnar, sum hava latið nýggja skúlanum gávu, eru Cosmos Trawl, TopCoat og Nordtek.
Sum skilst, fer Skagens Skipperskole, sum nú stendur nýbygdur við havnalagið í Skagen, at brúka peningin til keyp av innbúgvi til skúlan.
Arbeiðið við nýggja skúlanum, sum Portalurin annars vitjaði tíðliga í summar, gongur nú móti endanum, og sjálvur bygningurin skal verða heilt liðugur hin 9. desember í ár.
Nógvir føroyingar hava gingið á Skagens Skipperskole gjøgnum árini. Hølisumstøðurnar hava ikki verið tær bestu, men á skúlanum hevur eftir øllum at døma verið stórt hjartarúm.
Nú verður so nýggi skúlin, sum stjórin her vísir fram fyri Portalinum, skjótt liðugur og klárur at taka í nýtslu.
