- Hetta er eitt gott stað til eina slíka loysn!
Orðini eigur Uni Vestureið, løgregluovasti.
Staðið er við barnaskúlan í Gøtugjógv.
Og loysnin eru tey nýggju ferðtálmandi skeltini.
Í farnu viku varð nýggja herferðin við at minka um ferðina sett í verk á fýra støðum kring landið Sandavági, Skipanesi, Søldarfirði og her við Gøtugjógv.
Hetta skuldi sjálvandi markerast, og tað varð gjørt við einum kunnandi fundi í skúlanum við Gøtugjógv. Her vóru umboð fyri Landsverk, løgregluna, kommunurnar, skúlarnar og onnur boðin við.
Á samkomuni greiddi Uni Vestureið frá, at ein hevði valt júst hetta staðið við Gøtugjógv av teirri orsøk at ein her hevði ein trupulleika.
Roynt hevur verið at tálma ferðsluni, men hetta hevur ikki verið nøktandi. Tað vónar ein hinvegin við hesum nýggju elektronisku skeltunum.
Tálma ferðsluna
Hesi nýggju skeltini virka á tann hátt, at tey siga frá mest loyvdu ferðini 30 km/t í tíðarskeiðum tá børnini fara í og úr skúla.
Hetta skal fáa bilførarar at hugsa seg um og minka ferðina niður til tað loyvda. Og soleiðis verður vónað, at skúlavegurin kann gerast tryggur hjá børnunum.
Hetta er kortini ikki einasta skelti av slíkum slagi. Eitt líknandi elektroniskt skelti sum hetta stendur eisini við skúlan í Søldarfirði.
Umframt hetta eru ferðgáar settir upp á øðrum støðum, eins og greið skelti sum vísa mest loyvdu ferðina.
Gevur úrslit
Henda nýggja átakið hevur verið í umbúna eina tíð, og er nú umsíðir sett í verk.
Hugskotið til hetta er kortini ikki tikið úr leysari luft. Ein hevur nevniliga royndir við slíkum í grannalondum okkara.
Í danska býnum Brovst varð eitt líknandi átak sett í verk, og tá eftirmetingin varð gjørd, var úrslitið púra greitt: 88 % av foreldrunum hildu, at nú var skúlavegurin vorðin munandi tryggari hjá børnum teirra.
Men vísti Uni á hetta tekur kortini ikki ábyrgdina frá bilførarunum. Hetta átakið ger ferðsluna tryggari, gamaní. Men avbjóðingin er nú at fáa bilførarar sjálvar at skilja og at halda seg til ásetingarnar í ferðslulógini og herundir eisini mest loyvdu ferðina.
Ætlanin er haraftrat at ferðsluløgreglan verður nógv meiri at síggja á føroysku vegunum nú og framyvir.
- Hjálpir tað ikki, so fer løgreglan at heilsa uppá viðkomandi, legði Uni aftrat.
FAKTA
Ferðtálmandi tiltøk
Hetta eru ferðtálmandi tiltøkini, sum nú eru sett í verk:
- Við Gøtugjógv eru talvur settar upp áðrenn bygdaskeltini, ið vísa at ferðin verður sett niður stigvíst frá 80 km/t til 60 km/t.
- Ferðgáar eru settir upp við bygdaskeltini í Sandavági og á Skipanesi.
- Við skúlan við Gøtugjógv og í Søldarfirði eru uppsett elektronisk broytilig skeltir, ið vísa 30 km/t í tí tíðarskeiði, tá ið børnini ferðast millum skúlan og heimið
