Línuskipið Sandshavið eigur eina av teimum 38 umsóknunum um menningarkvotur. Eigararnir av Sandshavinum hava í fleiri ár arbeitt við at byggja eitt nýtt og nútímans frystilínuskip, men umstøðurnar hava gjørt, at tað hevur verið trulpt at fingið seinasta partin av fíggingini til hesa stóru verkætlan, sum kostar væl oman fyri 100 miljónir krónur.
- Vit halda, at tær kvotur og dagar, sum Sandshavið eigur, eru eitt gott og stórt grundarlag at reka skipið, men tað verður neyðugt at fáa lut í menningarkvotum, um nýggja skipið skal byggjast, sigur reiðarin, Kristian Martin Petersen.
Hann vísir á, at Sandshavið eigur lut í felagskvotu á Flemish Kap, felagskvotu í Eysturgrønlandi, eginkvotu í Íslandi og fiskidagar undir Føroyum. Í umsóknini ynskir reiðaríið menningarkvotu, soleiðis at grundarlagið undir nýggja skipinum verður betri.
- Fáa vit lut í menningarkvotum, sum vit vóna, at vit fáa, er ætlanin í fyrstu atløgu at samstarva við onnur skip um uppsjóvarkvotuna hjá Sandshavinum. Eitt slíkt samstarv fer at bøta um fíggjarliga grundarlagið at byggja nýggja skipið.
Kristian Martin Petersen vísir á, at í langtíðarætlanini fer felagið eisini at byggja eitt lítið virki á landi í heimbygdini, og eigararnir vænta, at tilsamans kunnu menningarkvoturnar skapa grundarlag undir umleið 35 ársverkum umborð, tí skipið skal hava dupulta manning - og á landi verða so eini 25 ársverk, har tørvur verður bæði á faklærdum og ófaklærdum fólki.
- Gongur tað, sum ætlað hjá monnunum aftan fyri Sandshavið, og menningarkvotur verða útskrivaðar í hóskandi nøgd til felagið, so verður beinanvegin farið í gongd við at byggja tað nýggja skipið. Byggitíðin er umleið 20 mánaðir, og tí ræður bara um at koma skjótt í gongd og skapa nýggj virðir til landið.
Kristian Martin Petersen sigur, at við menningarkvotum og nýggja skipinum verður felagið eisini kappingarført, tá botnfiskakvotur verða seldar á uppboðssølu.
