Trý tey seinastu vikuskiftini hevur landskappingin verið á dagsskrá. Í vikuskiftinum, sum stendur fyri framman, heldur landskappingin frí. Tað kemst av, at fyrsta umfarið í steypakappingini er á dagsskrá. Innleiðandi umfarið var 15. mars, tá ið Giza/Hoyvík vann 2-0 á B71 og tá ið Undrið vann 2-1 á MB.
Í 1. umfari eru átta dystir. Sjey verða spældir í morgin, og ein – grannauppgerðin í Gundadali – verður spældur sunnudagin. Tað er longu nú greitt, at tvey feløg í bestu deildini nú beinanvegin verða varpað úr kappingini. Hetta kemst av, at lutakastið lagaði tað soleiðis, at umframt HB og B36 verður ein uppgerð aftrat millum feløg í bestu deildini. Steypavinnararnir tvey tey seinastu árini, Víkingur, fáa vitjan av Skála.
Fyrsta steypakappingin var í 1955, og síðani hevur tað verið kappast á hvørjum ári um ísafjarðarbikar, ísafjarðarsúlur og løgmanssteyp. Harvið er 2014 útgávan nummar 60 í røðini.
Stikkvegur út í Europa
Í føroyskum fótbólti snýr tað seg fyrst og fremst um at vinna FM og so um at vinna steypakappingina.
Umframt heiðurin av at vinna og róman kring sigursharrarnar, so telur tað serliga nógv, at sigur í steypakappingini veitir trygd fyri altjóða luttøku næsta kappingár. Í kappingini, sum tað nú verður farið undir, vil tað siga, at tann, sum vinnur finaluna 30. august, tryggjar sær rætt at taka lut í europeisku kappingini á sumri í 2015.
Soleiðis hevur tað verið síðani 1991, tá ið B36 vann steypafinaluna og í 1992 sum fyrsta føroyska felagið í 1992 luttók í europeisku steypakappingini. Henda kappingin er ikki til longur, men steypavinnararnir kring Europa vinna sær rætt at taka lut í Europa League, sum kappingin nú nevnist, har steypavinnarar og tey feløgini, sum stóðu seg væl, men ikki rukku europeisku meistarakappingini, spæla.
Í fjør var Víkingur steypavinnari, og harvið er tað greitt, at víkingarnir í summar skulu luttaka í europeiskum fótbólti. Í fyrraárið var tað eisini Víkingur, sum vann steypakappingina. Tí vóru víkingarnir og Sigfríður Clementsen eisini síðsta summar í europeiska eldinum. Luttøkan í fjør var minnilig, tí tá eydnaðist tað Víkingi at vinna samantalt á Inter Turku úr Finlandi. Á Svangaskarði var úrslitið 1-1, og so gjørdu víkingarnir tað bragdið at vinna 1-0 í Finlandi. Sigursmálið skoraði Hanus Jacobsen við brotssparki, tá ið tað restaðu tíggju minuttir. Dysturin og úrslitið vórðu kend um allan heimin, tá ið tað seinni vísti seg, at armenski dómarin var blandaður upp í vedding í sambandi við henda dystin.
Víkingur skrivaði føroyska steypasøgu og fótbóltssøgu við at kvalifisera seg til næsta umfarið. Tá gekk minni væl, tí rumenska FC Petrolul Ploiesti vann 4-0 á Svangaskarði og 3-0 á heimavølli.
Tann minni tætt við
Steypakappingin er møguleikin hjá teimum smáu at kappast á jøvnum føti við tey stóru. Harvið er eisini møguleiki fyri, at tey smáu við at spíla seg út ella at spæla yvir evni, sum tað verður tikið til, kunnu basa teimum stóru. Hetta er ikki ókent, og ein av orsøkunum plagar at vera, at tey stóru ikki taka uppgávuna í nóg stórum álvara. Tann minni verður undirmettur.
Í Onglandi var tað púra óvæntað í fjør, tá ið Wigan, sum flutti niður úr bestu deildini, vann finaluna ímóti silvurvinnarunum í Manchester City 1-0.
Síðsta ferðin, at eitt lið úr næstbestu deildini vann steypafinaluna í Onglandi, var í 1980. Ta ferðina vann West Ham, sum var í næstbestu deildina, á Arsenal. Úrslitið var 1-0, og málskjútti var navnframi Trevor Brooking, sum ofta var miðvallari á landsliðnum, og sum síðani hann gavst at spæla hevur arbeitt sum viðmerkjari í fjølmiðlunum og okkurt skifti hevur verið venjari.
Í Føroyum er tað ongantíð komið fyri, at felag úr næstbestu deildini hevur vunnið steypafinaluna. Men tað er meiri enn so komið fyri, at felag í næstbestu deildini hevur spælt seg í finaluna. Í áttati árunum var annað finaluliðið ikki færri enn tríggjar ferðir úr næstbestu deildini.
Fyrsta ferðin var í 1980, tá ið HB vann finaluna 2-0 ímóti NSÍ, sum um tað mundið var í næstbestu deildini. Og tiltikið er tað, tá ið Royn í 1983 stríddi seg í finaluna, sum hvalbingar tó taptu 5-1 ímóti GÍ. Ta ferðina vann Royn samantalt í tveimum hálvfinalum ímóti HB, sum annars hevur verið steypaliðið framum øll onnur. Úrslitini vóru 2-2 í Hvalba og 4-3 til Royn í Gundadali!
Triðja ferðin var í 1987, tá ið ÍF, sum tá var í næstbestu deildini, spældi seg í finalu ímóti HB, sum vann 3-0.
Løgmanssteypið
Fram til 1988 varð spælt um bikar og súlur, ið av íslendingum av Ísafirði vóru latnar føroyingum at kappast um. Søgan um hvussu tað kom í lag, at íslendingar góvu føroyingum steyp at kappast um, er søgd fleiri ferðir áður, so hana verður tað ikki gjørt meiri við í hesum umfarinum.
Í 1989 var fyri fyrstu ferð kappast um steypið, sum løgmaður hevði givið at kappast um. HB hevði vunnið ísafjarðarbikarið til ognar í 1964 og síðani tríggjar súlur – í 1973, 1980 og 1988. HB vann fyrsta løgmanssteypið til ognar, og B36 vann annað løgmanssteypið til ognar.
Frá 1995 og fram til 2004 var steypakappingin skipað í bólkum. Fýra lið vóru í hvørjum bólkinum, og so vóru fjórðingsfinalur, hálvfinalur og finala.
Bólkaumfarið varð eisini ætlað sum venjing undan landskappingini, men tað varð hildið uppat við hesum, tá ið landskappingin í 2005 varð víðkað úr 18 og upp í 27 umfør. Úrslitini í bólkaumfarinum bóru viðhvørt boð um, at tað var ivasamt, hvussu nógva venjing dystirnir góvu. Størsta sigurin vann HB 2. mai 1995. Úrslitið ímóti Skansanum var 22-0!
Bygdirnar størri leiklut
Hóast tað tey seinnu árini ikki hevur ligið so ræðið fyri hjá HB, sum tað gjørdi nógvu tey fyrstu árini, so er sigursvanda havnarfelagið framvegis tað, ið hevur vunnið løgmanssteypið flestar ferðir.
Merkisvert er tað tó, at tey seinastu árini hava tað verið bygdirnar, sum hava vunnið steypakappingina. HB hevur ikki vunnið síðani 2004, og síðsti finalusigurin hjá B36 er skrásettur at vera í 2006.
Seinnu árini hava tað verið bygdafeløgini, ið hava sett dagsskránna. EB/Streymur hevur vunnið fýra ferðir, og Víkingur hevur vunnið tríggjar ferðir. EB/Streymur vann í 2007 minniliga finalu 4-3 á HB, og í 2008 var tað aftur undirhaldandi, tá ið EB/Streymur vann 3-2 ímóti B36. Síðani tá hava tað verið Víkingur, EB/Streymur og ÍF, sum hava verið í finalunum. ÍF tapti ímóti EB/Streymi í 2010 og 2011. Víkingur hevur vunnið tríggjar finalur á EB/Streymi 3-2 í 2009, í 2012 endaði tað 3-3 og Víkingur vann síðani brotssparkskappingina, og í fjør vann Víkingur 2-0 á EB/Streymi.
Longu undan fyrsta umfari er tað greitt, at annað av stóru feløgunum í Gundadali longu sunnudagin verður varpað úr kappingini. Sunnudagin bresta HB og B36 saman.
60 ára úrslit
Leygardagin og sunnudagin verður fyrsta umfar í 60. útgávuni av føroysku steypakappingini. 2014 er fyrsta útgávan í aðru fjórðingsøld av kappingini um løgmanssteypið.
HB hevur vunnið 26 steypafinalur, GÍ, sum ikki er til longur, vann 6 steypafinalur, TB, KÍ og B36 hava vunnið 5 finalur, EB/Streymur hevur vunnið 4 finalur, Víkingur hevur vunnið 3 finalur, NSÍ hevur vunnið 2 finalur og VB og B71 hava vunnið eina ferð í part.
Eina ferð – í 1970 – varð finalan ikki spæld, tí tað fekst ikki semja um, hvar HB og KÍ skuldu spæla.
Fyrsta umfar 2014
Lutakastið til fyrsta umfar lagaði seg soleiðis, at í seks av uppgerðunum er tað felag úr bestu deildini, sum skal dystast við felag í lægri deild. Harvið er talan um greiðar favorittar.
EB/Streymur skal spæla ímóti Giza/Hoyvík, sum spælir í 2. deild, B68 skal spæla ímóti Royn, sum spælir í 3. deild, og ÍF skal spæla ímóti Undrið, sum spælir í 2. deild. Tað er lítið sannlíkt, at nakað av feløgunum í 2. og 3. deild skal gera nakað við liðini í Effo-deildini. Men talan er um steypakapping, og tá er møguleiki fyri tí mest óvæntaða.
Í uppgerðini millum havnarfeløgini er tað greitt, at HB skal hava annan málverja. Teitur M. Gestsson varð so mikið illa skaddur síðsta sunnudag ímóti KÍ, at hann ikki verður førur fyri at spæla. Heðin Stenberg er leigaður av Argjum og heim um ánna at hjálpa HB.
Tað er eisini greitt, at miðverjin Jonas Flindt Rasmussen ikki verður á KÍ liðnum ímóti 07Vestur. Jonas sá reytt ímóti HB, og ásetingarnar siga, at leikbann fyri reytt kort er galdandi í næsta dysti. Umframt nýggjan mann í miðverjuna, har tað væl kann hugsast, at Ísak Simonsen fær høvi at royna seg, so fáa fleiri aðrir á KÍ beinkinum høvi at royna seg. Heðin Klakstein, Álvur F. Christiansen og Atli Danielsen eru ikki tøkir.
Hjá Víkingi er miðvallarin Hans Jørgen Djurhuus tøkur aftur, eftir at hann tvey tey seinastu umførini hevur verið leikbannaður í landskappingini.
- - -
Leygardagin 5. apríl:
Giza/H - EB/Str.
Johan Petur Michelsen kl. 17.00
FC Suðuroy - NSÍ
Eiler Rasmussen kl. 15.00
B68 - Royn
Bent Tommy Linklett kl. 16.00
AB - TB
Ransin N. Djurhuus kl. 15.00
ÍF - Undrið
Rúni Gaardbo kl.
KÍ - 07Vestur
Rói Jacobsen kl. 17.00
Víkingur - Skála
Páll Augustinussen kl. 15.00
Sunnudagin 6. apríl:
HB-B36
Dagfinn Forná kl. 15.00
