Eitt flagg við búmerkinum hjá G! Tað er eingin óvanlig sjón í hesum døgum. G! verður skotið í gongd í morgin, men longu í kvøld letur tjaldingarplássið upp.
Hinvegin er flagg við búmerkinum hjá G!, avmyndað á innlandsísinum í Grønlandi ikki nøkur vanlig sjón.
– Eg tosaði við Jónheðin Tróndheim (redaktørur og myndamaður hjá G!, blðm.) undan míni fer til Grønlands, og tá fingu vit hugskotið um G!-flaggið á ferð, greiðir Hallur Helmsdal frá, sum eisini tók eina mynd av flagginum og sær á innlandsísinum í Grønlandi.
Síðani hevur hann givið flagginum kongaligan og mentanarligan dám, við at avmynda tað uttanfyri Amalienborg, har drotningin býr, og frammanfyri Operahúsið í Keypmannahavn.
Flaggið úr cockpit’inum
Seinasta stuntið hjá Halluri Helmsdal var, at tosa pent við Magna Arge.
– Vit avtalaðu so, at tað var í ordan, at vit tóku eina mynd, meðan eg hekk úr flogfarinum á einum av teirra flogførum, fortelur Hallur Helmsdal.
Bara til stuttleikar
Spurdur, hví Hallur Helmsdal tekur hetta flagg við á ferð, er svar hansara hetta:
– Sum so nógv onnur gangi eg og gleði meg til G!, og hví ikki gera nakað øðrvísi burtur úr tí, sigur Hallur Helmsdal.
