Sólskinssøgan við Leicester í høvðusleiklutinum fekk í dag eina heldur neiliga fótnotu. Leicester taptu í dag 2-1 fyri Hull City í fyrsta umfari í nýggja kappingarárinum í Premier League.
Les eisini: Hesir eru favorittar at vinna Premier League
Hetta er fyrstu ferð í søguni, at meistaraliðið tapur í fyrstu royndini í eftirfylgjandi kappingarárinum. 19 ferðir hevur tað eydnast meistaraliðnum at vinna, meðan tað fýra ferðir er enda við javnleiki.
Leicester hevði annars fleiri møguleikar í fyrra hálvleiki, har serliga navnframi Jamie Vardy kundi havt umsett til mál. Fyrsta málið í nýggja kappingarárinum skoraði norski Adama Diomande, tá hann í felag við Abel Hernandez saksaði bóltin í málið.
Ja, tú læs rætt. Teir tveittu seg báður afturav og saksaðu bóltin í senn. Fyrst rakti Abel Hernandez bóltin – og í at kalla somu løtu rakti Adama Diomande bóltin. Riyhad Mahrez javnaði eftir brotsspark, áðrenn Robert Snodgrass avgjørdi dystin.
Klokkan trý vóru fimm dystir. Tríggir teirra endaðu 1-1. Har í millum Everton móti Tottenham. Swansea og WBA vunnu góðar útisigrar á avikavist Burnley og Crystal Palace.
Premier League 1. umfar:
Í dag:
Hull City - Leicester City 2-1
Burnley - Swansea City 0-1
Crystal Palace - West Bromwich Albion 0-1
Everton - Tottenham Hotspur 1-1
Middlesbrough - Stoke City 1-1
Southampton – Watford 1-1
Manchester City – Sunderland (17:30)
Sunnudagin:
AFC Bournemouth - Manchester United 13:30
Arsenal – Liverpool 16:00
Mánadagin:
Chelsea - West Ham United (20:00)
